काठमाडौँ — रेडियो कान्तिपुरले बर्षेनि गर्दै आएको ‘रेडियो अन ह्विल्स’ को सातौं संस्करणको सांगीतिक कार्यक्रम सोमबार वीरेन्द्रनगरमा सम्पन्न भएको छ ।

उक्त अवसरमा हास्यकलाकार राजा राजेन्द्र पोखरेल, गायक विश्व नेपाली, डान्स च्यापियन नेपाकी विजेता वर्षा फुयाल, डान्स च्याम्पियन सिजन–१ की विजेता रोसिका रावतलगायतले प्रस्तुति दिए ।

नेपालगन्जमा शनिबार सुरु भएको यो वर्षको कार्यक्रम आइतबार धनगढी हुँदै सुर्खेत पुगेको हो ।

वीरेन्द्रनगरस्थित घण्टाघरमा झन्डै ४ घण्टा भएको कार्यक्रममा कलाकारको प्रस्तुति र दर्शकको हुटिङले आसपासको क्षेक्र गुञ्जायमान बन्यो । कार्यत्रमको बीचबीचमा खेलाइएको क्विजलगायत खेलले दर्शकको मन जित्यो । दर्शकलाई प्रायोजकका तर्फबाट विभिन्न उपहार वितरण गरिएको थियो भने रेडियो कान्तिपुरका प्रस्तोताद्वय महिमा भट्टराई र प्रज्वल खड्काले सांगीतिक माहोललाई रोचक बनाएका थिए ।