काठमाडौँ — नेपाली संगीत क्षेत्रका वरिष्ठ संगीतकार शम्भुजित बास्कोटालाई दीर्घ साधना सम्मान(लाइफटाइम अचिभमेन्ट) बाट सम्मान गर्दै ‘नेसनल म्युजिक अवार्ड्(एनएमए) २०८१’ सम्पन्न भएको छ । रेडियो कान्तिपुरले शनिबार गोदावरी सनराइज कन्भेन्सन सेन्टरमा आयोजना गरेको एनएमएमा १४ विधामा अवार्ड वितरणसँगै कन्सर्ट सम्पन्न भयो ।
चलचित्रका ३ सय ७५ र २ हजार बढी गीतमा संगीत भरिसकेका शम्भुजितलाई संगीत सम्राटको उपनाम दिँदै नगद एक लाखसहित सम्मान गरिएको हो ।
‘साँढे पाँच दशक संगीतमा अनवरत लाग्नु भएका संगीत सम्राट सम्भुजित बास्कोटालाई हामीले दीर्घ साधना सम्मान प्रदान गरेका छौं,’ रेडियो कान्तिपुरका स्टेसन म्यानेजर पवन आचार्यले भने । सम्मानपछि संगीतकार बास्कोटाले नेपाली संगीतले देशलाई विश्वमा चिनाउन ठूलो भूमिका खेल्ने बताए ।
‘नेपाली संगीत, कला र साहित्य विश्वको त्यो चुलीमा पुग्नेछ । देशलाई चिनाउन ठूलो भूमिका संगीतले नै गर्नेछ । संगीत मेरो जीवनको लामो यात्रा हो, उकाली, ओराली हो । लाइफटाइम अचिभमेन्टका लागि धन्यवाद । अनुशासनमा बसेर गरिएको संगीत विश्वमा पुग्नेछ,’ शम्भुजितले भने ।
गायिका अस्मिता अधिकारी र सुरेश लामाले शम्भुजितलाई ‘यो जीन्दगीले’, ‘म त अब रिसाउँछु’, ‘सुनकोशी सुसेलेको’, ‘तिम्रो मन त चक्कु छुरी’ गाउँदै ‘ट्रिब्युट’ गरे ।
अवार्डतर्फ गायक आरसी रिमालले ‘उत्कृष्ट डेब्यु सिंगर’को विधामा जित हासिल गरे । यो विधामा उनीसहित सुवोध ढकाल, सुवास सुन्दास, नीरु बुढामगर, करण परियार मनोनयनमा परेका थिए ।
त्यस्तै, 'उत्कृष्ट लोकदोहोरी गायिका' को अवार्ड शान्ति श्री परियारले जितिन् । यो विधामा उनीसहित रीता थापामगर, अन्जु विश्वकर्मा, पूर्णकला बिसी र देवी घर्ती मनोनित थिए ।
त्यस्तै ‘उत्कृष्ट लोकदोहोरी गायक‘को अवार्ड भने गायक प्रकाश दुतराजले जिते । यो विधामा शिरिष देवकोटा, मौषम गुरुङ, खेम सेञ्चुरी र विश्व दोङ मनोनयनमा थिए ।
तस्बिरहरु : दीपेन श्रेष्ठ/कान्तिपुर
‘उत्कृष्ट गीतकार’को अवार्ड भने भूषण खरेलले जिते । यो विधामा उनीसहित डा. शम्भू जम्कटेल, डा. दामोदर रेग्मी, होमनाथ न्यौपाने र अविरल थापा मनोनित थिए । ‘उत्कृष्ट आधुनिक गायिका’को अवार्ड ‘ए जिन्दगी’बोलको गीतबाट गायिका टिका प्रसाईंले जितिन् । यो विधामा उनीसँगै ‘अनायसै आँधी चल्यो’बाट रचना रिमाल, ‘एकान्तमा आँशु बनी’बाट लबोनी चक्रवर्ती, ‘एउटा सानो घर होला’बाट बबिना भट्टराई र समीक्षा अधिकारी ‘तिम्रो र मेरो संसार बेग्लै’बाट मनोनयनमा परेका थिए ।
‘उत्कृष्ट आधुनिक गायक’को अवार्ड गायक शिव परियार ‘चुपचाप’बोलको गीतबाट जिते । यो विधामा उनीसित गायकहरु सत्यराज आचार्य, प्रवीन बेडवाल, विश्व नेपाली र शशि गुरुङले प्रतिस्पर्धा गरेका थिए ।
‘उत्कृष्ट पार्श्व गायक’को अवार्ड भने ‘रुकुम मैकोट’बाट एसडी योगीले जिते । यो विधामा योगीसँगै रोमन आचार्य, सनुप पौडेल, आशिष अविरल र निशान भट्टराई मनोनयनमा परेका थिए । ‘उत्कृष्ट पार्श्व गायिका’को अवार्ड समीक्षा अधिकारीले ‘बोक्सीको घर’को गीत ‘बुझिन मैले’बाट जितेकी छन् । ‘झ्यालको’बाट झूमा लिम्बू, ’राई माइला’बाट सुनिता थेगिम, ‘रुकुम मैकोट’बाट शान्ति श्री परियार र ‘सारी लगाइदेउ’बाट सलिना विक मनोनित थिए ।
कार्यक्रममा सन्जीव बराइली ‘उत्कृष्ट संगीतकार’ घोषित भए । ‘चुपचाप’बोलको गीतबाट उनले यो विधामा अवार्ड जितेका हुन् । यो गीतले एनएमएमा दुई अवार्ड जित्यो । ‘उत्कृष्ट संगीतकार’को विधामा सुनिल मास्के, सुरज पण्डित, कृति न्यौपाने र बीबी अनुरागी मनोनयनमा परेका थिए ।
‘कुम: सागर एण्ड ख्वप’ ब्यान्ड’ एनएमएमा ‘उत्कृष्ट ब्यान्ड’ घोषित भयो । ‘ए माइ रे’ गीतबाट ब्यान्ड यो विधामा मनोनयनमा परेका थियो । यो विधामा स्वर फिचरिङ जोन चाम्लिङ राईको ‘बादलसरी’, ‘रकहेड्स’को ‘भावना’, अभया एण्ड दि स्टिभ इन्जिन्सको ‘सधैँभरि’, ‘पूर्ण राई एण्ड दाजुभाइहरु’को ‘स्पर्श संगीत’बोलको गीत मनोनयनमा थियो । यो वर्षबाट थप गरेको ‘हिपहप, आर एण्ड बी’ विधामा ब्रिजेश श्रेष्ठले ‘मुटुमै बसेछ’ बोलको गीतबाट अवार्ड जिते । यो विधामा र्यापर ओएमजी, भेक र जेम्सी, यावेश र बिजेन अनि दिमितृ मनोनित थिए ।
गायिका त्रिशला गुरुङ कार्यक्रममा ‘उत्कृष्ट पप गायिका’ घोषित भइन् । आस्था तामाङ मास्के, रचना दाहाल, समृद्धि राई र सज्जा चौलागाईं ‘उत्कृष्ट पप गायिका’को विधामा उनीसित शीर्ष पाँचको मनोनयनमा परेका थिए ।
गायक सुशान्त केसीले ‘बार्दली’बाट ‘उत्कृष्ट पप गायक’को अवार्ड जिते । यो विधामा सुशान्तसँगै सुजन चापागाईं, सज्जनराज वैद्य, जोन चाम्लिङ राई र स्वप्न सुमन शीर्ष पाँचको मनोनयनमा परेका थिए । ‘बार्दली’को प्रभाव भारतसम्म यसको हिन्दी रिमेकले पुर्याएको छ ।
यही गीतबाट सुशान्तले ‘पिपुल च्वाइस अवार्ड’ पनि जिते । यो विधामा ‘ए माइ रे’बाट ‘कुम: सागर एण्ड ख्वप ब्यान्ड’, ‘दुश्मन हेरेको हेर्यै’बाट दुर्गेश थापा, ‘ढलेँढलेँ’बाट शान्ता रानी परियार, ’ रुकुम मैकोट’बाट एसडी योगी र शान्तिश्री परियार मनोनयनमा परेका थिए । यो विधाको विजेता दर्शकको भोटले निर्धारण गरेको हो ।
कार्यक्रमबीच माहोल तब तातियो जब युवा गायक दुर्गेश थापाले ‘दुश्मन हेरेको हेर्यै’ माथि दर्शक झुमाउने नृत्यसहितको प्रस्तुति दिए । डान्सिङ समूहसहित दुर्गेशले ‘दुश्मन हेरेको हेर्यै’सहित ‘बमबम भोले’ र ‘जाने भए जाम माया’ बोलको गीतमाथि गायन प्रस्तुति दिए ।
उनको प्रस्तुतिमा केही दर्शकले आफ्नो स्थानमा उभिएर नाचे । ‘ठूलोलाई सम्मान सानोलाई माया गर्नुपर्छ । म अहिले पनि अग्रजलाई भेट्दा उहाँहरुलाई आदर गर्छु । गाउँबाट आउँदाको दुर्गेशजस्तो थियो, अहिले पनि त्यस्तै छ । त्यसैले त दुर्गेश थापा नाम होइन, ब्रान्ड हो,’ प्रस्तुतिपछि दुर्गेशले दर्शकदीर्घातर्फ हेर्दै भने । कार्यक्रममै ‘रेडबुल इनर्जेटिक पर्फमेन्स’बाट दुर्गेश सम्मानित भए ।
एनएमएको सुरुवातमा गायक स्वप्न सुमनले ब्यान्डसहित ‘उपहार’ र ‘राधा’बोलको गीतमाथि प्रस्तुति दिएका थिए । कार्यक्रममा थुप्रै गायक/गायिकाले गायन प्रस्तुति दिए । गायक पशुपति शर्माले ‘झोले त तैँ, झोले त मैँ’बोलको गीतमाथि प्रस्तुति दिए ।
युवा गायक सुशान्त घिमिरेले आफ्ना नयाँ गीत ‘फेरि फेरि’, ‘मनचरी’ बाट प्रस्तुति दिए । वाङ्देन शेर्पाले ‘मायालु’बोलको गीतमाथि प्रस्तुति दिए भने, उनी र सुशान्तले मिलेर ‘जुन नहेरी’बोलको गीतमाथि युगल प्रस्तुति दिए । यो गीतमाथि उनी दुईले प्रस्तुति दिइरहँदा दर्शकदीर्घाले पनि उनीहरुसँगै गाएका थिए ।
कार्यक्रममा सुन्दर खनाल र सुजिता श्रेष्ठले हास्यव्यंग्य प्रस्तुत गरे । सञ्चारकर्मी प्रकाश सुवेदी र गायक दुर्गेश थापाको अवतारमा यी दुईले उपस्थित दर्शक हँसाए । कार्यक्रमको समापन भने ‘कुम: सागर एण्ड ख्वप’ ब्यान्डको प्रस्तुतिसँगै भयो ।
ब्यान्डले अवार्ड पाउँदा कुम: दंग परे । ‘अवार्डमा मेरो मात्र हात छैन । यसमा मेरो ब्यान्ड सदस्य सबैको हात छ,’ कुम:ले अवार्ड पाउँदाको खुशी साटे । ब्यान्ड सदस्य रोजमान महर्जनले दर्शकको मायाभन्दा ठूलो अवार्ड नहुने बताउँदै ‘ए माइ रे’, ‘फुरफुरी’, ‘चमेली फूल’लगायतका चर्चित गीतहरुमाथि प्रस्तुति दिए । उनीहरुको प्रस्तुति सुन्न कार्यक्रममा उपस्थित दर्शक एनएमएको अन्त्यसम्ममै सनराइज कन्भेन्सनमा बसिरहे ।
