काठमाडौँ — 'हिन्दीभन्दा त नेपाली भर्सन नै मिठो छ !' भारतको चर्चित म्युजिक कम्पनी 'टि–सिरिज'को युट्युबबाट नेपाली गीत 'बार्दली'को हिन्दी रिमेक 'उफ' बजारमा ल्याउँदा अधिकांशले गायक सुशान्त केसीलाई यस्तै प्रतिक्रिया दिइरहेका छन् । सुशान्त 'टि सिरिज'सँगको सहकार्यले गर्दा हिन्दी भर्सन ल्याउनु परेको र नेपाली मन पराउनेहरुका लागि 'बार्दली' यथावत राखिएको धारणा राख्छन् ।

'नेपाली गीत मनपर्नेहरुका लागि नेपाली गीत छँदैछ, त्यो कतै गएको छैन । टि–सिरिजलाई हिन्दी चाहियो त्यसैले हिन्दी भर्सन लेखेँ,' सुशान्तले उक्त सहकार्यबारे भने, 'टि–सिरिजजस्तो युट्युब च्यानलमा नेपाली गायकको गीत आउनु ठूलो कुरा हो नि' । 

सुशान्तका अनुसार 'बार्दली' सुनिसकेपछि नै 'टि सिरिज' समूह हिन्दी भर्सनको प्रस्तावसहित एक महिनाअघि उनीसँग ठोक्किए । थुप्रो दर्शक संख्याबीच पुग्नु सुशान्तको पहिल्यैदेखिको सोच, 'टि–सिरिज' ढुंगा खोज्दा देउता भेटेजस्तै भइदियो ! 'नेपाली गायकका हिसाबले टि–सिरिजसँग सहकार्य गर्न पाउँदा निकै खुशी छु । यस्तो ठूलो युट्युब च्यानलबाट गीत ल्याउँदा निकै हर्षित छौं,' सुशान्तले खुशी हुँदै सुनाए ।

सर्जकका हिसाबले सुशान्तले 'बार्दली'माथि निकै विश्वास गरेका थिए । अहिलेसम्म लेखेका गीतमा छोटो अवधिमा तयार पारेको गीत हो यो । तिहारअघि स्टुडियोमा बसिरहँदा चेल्लोको एउटा धुन निस्कँदा, 'बार्दली'का शब्दहरु फुरेका थिए । निर्देशक नयन राई पनि स्टुडियोमै थिए । शब्दहरु गुनगुनाउँदै जाँदा सुशान्तलाई लाग्यो, -'यो त तिहारअघि नै निकाल्नुपर्छ' ।

त्यही अनुरुप एक हप्तामै अडियो र भिडियो तयार पारेर 'बार्दली' सार्वजनिक गरे । त्यतिबेला यो गीतले यस किसिमको चर्चा पाउला भन्ने सोचेका थिएनन् । तर, गीतको हिन्दी रिमेक बनाइरहँदा गीतभित्रको रमाइलो शैलीले सबै दर्शकको मन तानेको हो भन्ने लाग्छ, सुशान्तलाई । 'मलाई लाग्छ, जस्तो गीत भए पनि दर्शकले त्यसमा मनोरञ्जन पाउनुपर्छ । सायद यो गीतको अडियो र भिडियो उत्तिकै रमाइलो भएको हुनाले पनि दर्शक यो गीतमा रमाइदिए, परिवारसँग बसेर सुनिदिए,' सुशान्तले भने । 

उनका अनुसार 'टि–सिरिज'सँग जोडिन पाइसकेपछि 'उफ'को अडियोदेखि भिडियोमा मेहनत गर्न लामो समय लाग्यो । सुशान्तले कोविद बज्रसँग मिलेर अडियो तयार पारे । गीतको संरचना, बाजाहरु तयार पारेर नेपाली बाजा मिसाउन कोविदलाई जिम्मा दिए ।

'बार्दली'मा पनि कोविदसँगै सहकार्य गरिएको थियो । अडियो तयार पारेर भारतीय समूहलाई पठाइदिए । पहिलो अडियो नै मनपराइदिए, परिवर्तन गर्नुपर्ने कुनै सुझाव आएन । हिन्दी भर्सनको सबै सिर्जनात्मक पक्ष सम्हाल्न 'टि–सिरिज'ले सुशान्तलाई जिम्मा दिएको थियो । त्यसैले अडियो/भिडियोको जिम्मा नेपालले लियो ।

हिन्दी भर्सन बनाउने भन्दैमा गीतका शब्दलाई शाब्दिक रुपमा अनुवाद गर्न सुशान्तभित्रको सिर्जनात्मक पक्षले दिएन । त्यसैले २/३ दिन लगाएर हिन्दी शब्दहरु लेखे । गीतको धुन अनुसार त्यसमा हिन्दी शब्द मिलाइदिए, जस्तै; कैसे हुवा ये असर, तेरी कस्ती मे । डूबा हुँ सबको भूलके । जबसे मिला हुँ तुम्से, दिलके जबरजस्ती है । रखलूँ मे तुम्को ढुंडके…

जबकी गीतको यो पहिलो धुनमा सुशान्तले 'कहिले आउँछौं माया तिम्रो घरको बार्दलीमा । कुर्दैछु हेर्न तिमीलाई । हल्ला भो सारा यो सहर, गल्ली गल्लीमा । जिस्काउँछन् साह्रै नि मलाई' भन्ने नेपाली शब्द 'बार्दली'मा लेखेका थिए ।

'उफ'मा कोरिएका हिन्दी शब्दहरु नेपालीझैं उतिकै मिठा र लयात्मक छन् । 'उसको एक झलक, मुस्कानै अलग, मार्‍यो नि मायाले'जस्ता कोरसको हिन्दी भर्सन झनै मिठो सुनिन्छ -'उसकी एक झलक, मचती है धडक । उफ ? उनकी क्या बात करें ?'

'उफ'मा नेपाली मर्म जोगियोस् भन्ने सोचसहित गायिका इन्द्रकला राईले गाएको भागलाई पुरानै भर्सनमा राखिएको छ । 'उफ'को सुन्दर पक्ष नै यसमा मिसाइएको नेपालीपन हो । नेपाली बाजादेखि नेपाली भाषाले 'उफ'लाई 'बार्दली'जतिकै सुन्दर बनाइदिएको छ । नेपाली मर्मका लागि 'बार्दली'को महिला स्वर दुरुस्तै तानिएको छ;

लैजाउ है लैजाउ मलाई 

अहिले नै जवानीमा

कहाँ -कहाँ डुलाउँछौं मन  

'टि–सिरिजबाट नेपाली शब्द, नेपाली स्वर सुनाउन पायौं । खुशी छु,' सुशान्तले भने । सुशान्तले यसअघि 'क्या करदिया' बोलको हिन्दी भाषाको गीत गाएका थिए । अत्याधिक दर्शकमा पुगौं भन्ने सोचले नै आफूले नयाँ भाषाहरुमा गाउने कोसिस गरेको सुशान्त सुनाउँछन् ।

'चाइनिज आएको भए, चाइनिजमै गाइदिन्थें । नेपालमा हिन्दी भाषा सबैले बुझ्छन्, किन नगाउने भन्ने सोचले हिन्दी भाषामा गीत ल्याएको थिएँ,' उनले भने । युट्युबमा सार्वजनिक गरेको ८ घन्टामै करिब ८ लाख पटक हेरिएको गीतले पनि सुशान्तभित्रको यो हुटहुटी व्यक्त गरिदिन्छ । 

दुई रातमै खिचियो भिडियो 

'उफ'को भिडियो 'स्टेलर्स स्टुडियो'ले निर्माण गरेको हो । खासमा सुशान्तको अफिस नजिकै छ, 'स्टेलर्स स्टुडियो' । यसअघि स्टेलर्सले 'बार्दली'को भिडियो पनि बनाएको थियो ।

यो पटक पनि सुशान्तले भिडियोको जिम्मा उनीहरुलाई दिए । भिडियोका निर्देशक नयन राईका अनुसार भिडियो खिच्न करिब २ सय नेपाली जनशक्ति प्रयोग गरिएको छ । यसअघि एन्जोन लिम्बूले 'बार्दली'को भिडियो निर्देशन गरेका थिए, हिन्दी भर्सनको जिम्मा नयनले पाए । निर्देशनसँगै यो गीतको खिचाइमा पनि नयन नै थिए ।

अहिले नयनलाई नेपालबाट भन्दा पनि भारतीय दर्शकबाट गीतको अत्यधिक प्रतिक्रियाहरु आइरहेका छन् । यस किसिमको अन्तर्राष्ट्रिय कम्पनीसँग काम गर्न पाउनु स्टेलर्सका लागि पनि ठूलो चुनौतिको विषय थियो । त्यसैले भिडियोलाई उच्चस्तरको बनाउने सोचसहित प्रोडक्सन ठूलो खर्च गरिएको नयन सुनाउँछन् । टि–सिरिजले नयनको समूहलाई 'नेपाललाई जति सुन्दर देखाउन सकिन्छ देखाउनु' भन्ने निर्देशन दिएका थिए । गीतमा नेपालीपन झल्किनुपर्ने सुझाव पनि दिएको थियो । त्यसैले नयनको समूहले भिडियोमा तिहारको माहोल देखाउने प्रयास गरे । भक्तपुरको भादगाउँ रिसोर्टमा दुई दिन लगाएर गीतको भिडियो तयार पारे । तिहारको रमझम देखाउन उनीहरुले दुई रात गीतको भिडियो खिचे । दिनमा कलाकारले तयारी गर्थे, रातमा सुटिङ हुन्थ्यो । 

'बजेट ठूलो थियो । त्यसैले प्रोडक्सनमा कुनै कमी राखेनौं । घाम ढल्किएपछि हामी सुटिङ थाल्थ्यौं, अनि बिहान घाम उदाउनुअघि सकिन्थ्यो । खासमा दुई दिन र दुई रात लगाएर हामीले भिडियो खिचेका हौं,' नयनले भने, 'खासमा यो गीत हामी सबैका लागि ठूलो मौका थियो । त्यसैले राम्रो बनाउन कुनै ठाउँ छोडेनौं ।' सुशान्त नयनको कुरामा थप्छन्, 'उच्चस्तरको भिडियो निर्माण गरौं भनेर हामीले तयारी धेरै गर्‍यौं । डान्स सिक्न गयौं ।'

नयनका अनुसार गीतको भिडियो निर्माणमा ५० जना प्रोडक्सन क्रु थिए, डान्सिङ समूह ५० जना थिए । समग्रमा २ सय समूह भिडियो निर्माणमा जोडिएको थियो ।

'बार्दली'मा थुप्रै स्टारको अभिनय थियो । तर, 'उफ'मा स्वस्तिमा खड्का मात्रै दोहोरिएकी छिन् । किन ? खासमा 'उफ' टिमलाई नेपालको सर्वाधिक चर्चित अभिनेत्री भिडियोमा देखाउनु थियो । अग्रपंक्तिमा स्वस्तिमाकै नाम आइपुग्यो, 'टि–सिरिज'ले उनैलाई छान्यो । त्यसपछि भिडियोमा सुशान्तसँगै अभिनेत्री स्वस्तिमाले अभिनय गरे ।