पोखरा — ‘ऐना हेरेर’, ‘सररर पानीघट्टामा’, ‘रुन्छनी मन किन रुँदैन’ जस्ता चर्चित लोक तथा दोहोरी गीतका गायक पुरुषोत्तम न्यौपानेको शुक्रबार पोखरा सभागृहमा एकल साँझमा प्रस्तुत हुँदैछन् । राष्ट्रिय लोक तथा दोहोरी गीत प्रतिष्ठान नेपालको आयोजनामा ‘पुरुषोत्तम न्यौपाने सांगीतिक साँझ’ हुने भएको हो ।

प्रतिष्ठानले बुधबार पोखरामा पत्रकार सम्मेलन आयोजना गरी साँझमा पुरुषोत्तमका १८ गीत प्रस्तुत हुने जनाएको छ । सांगीतिक साँझमा उनको जीवनीमा तयार पारिएको वृत्तचित्र पनि प्रदर्शन गरिने प्रतिष्ठानकी अध्यक्ष रीता थापामगरले जानकारी दिइन् । प्रतिष्ठानले गत वर्ष ‘नारायण रायमाझी सांगीतिक साँझ २०८०’ आयोजना गरेको थियो । बर्सेनि एक प्रतिष्ठित लोकदोहोरी कलाकारलाई प्रस्तुत गर्ने प्रतिष्ठानको योजनाअनुसार कार्यक्रम गर्न लागिएको उनले बताइन् । सांगीतिक साँझमा निःशुल्क प्रवेशको व्यवस्था प्रतिष्ठानले गरेको छ ।