काठमाडौँ — केही महिनाअघि फिल्ममेकर अनुराग कश्यपले बलिउड छोड्न लागेको बताएका थिए । उनले आवेगमा आएर त्यस्तो बोलेका होलान् भन्दै कतिपयले त्यस कुरालाई बिर्सिसकेका थिए । तर, अचानक उनले आफू मुम्बई छोडेर अन्यत्र सरिसकेको कुरा सार्वजनिक गरेका छन् । यो खबरले यतिबेला भारतीय सिने क्षेत्रमा सनसनी मच्चाइरहेको छ ।

उनले हालसालै मुम्बई बाहिरको आफ्नो नयाँ घरको पहिलो भाडा तिरेको बताउँदै आफूले उक्त निर्णय कार्यान्वयन गरेको जानकारी दिएका हुन् । केही महिनाअघि मात्र गत डिसेम्बर ३० मा सार्वजनिक द हलिउड रिपोर्टर इन्डियामा विशाल मेननसँगको कुराकानीका क्रममा उनले आफूले बलिउड एवं मुम्बई छाड्ने कुरा सार्वजनिक गरेका थिए ।

बुधबार मात्रै द हिन्दुसँगको कुराकानीमा उनले आफूले मुम्बई छोडिसकेको बताएका छन् । फिल्ममेकर कश्यपले बसाइँसराइको कारणबारे चर्चा गर्दै मुम्बईको हलचल र हिन्दी फिल्म उद्योगको प्रतिस्पर्धात्मक माहोलबाट आफूलाई टाढा राख्नका लागि सहर छोड्नुपरेको स्पष्ट गरेका छन् । आफूले नयाँ घरमा पहिलो महिनाको भाडासमेत तिरिसकेको उनले बताएका छन् । उनले आफू कुन राज्य वा सहरमा सरेका छन् भन्ने कुरा भने उनले हाललाई गोप्य नै राख्न चाहेको उल्लेख गरेका छन् । यद्यपि, कतिपय स्रोतका अनुसार उनी बेंगलोर सरेको हुनुसक्ने अनुमान गरिएको छ । 

'विषाक्त' बलिउड फिल्म उद्योगमा सिर्जनात्मकता र वास्तविकता कमै देख्न थालिएको हुँदा त्यसले आफू निराश भएको उनले बताएका छन् । उनले भनेका छन्, 'म फिल्म क्षेत्रका मानिसहरूबाट टाढा रहन चाहन्छु । उद्योग निकै विषाक्त भइसकेको छ । सबैजना अवास्तविक लक्ष्यहरू पछ्याउँदै छन् । ५०० वा ८०० करोड भारुको फिल्म बनाउन खोज्दैछन् । फिल्म कस्तो बनाउने भन्दा पनि कति बजेटको बनाउने भन्नेमा होडबाजी चलिरहेको छ । हिन्दी फिल्म उद्योगमा अब सिर्जनात्मक वातावरण पूर्णरूपमा हराइसकेको छ ।'

उनका अनुसार अहिलेको बलिउड फिल्म उद्योग निकै संकुचित र बजारको दबाबमा धस्सिएको छ । बलिउडका फिल्म निर्माता र प्लाटफर्महरू नयाँ र चुनौतीपूर्ण विचारहरू स्वीकार्न डराउने हुँदा कामको प्रक्रियामा अनावश्यक रूपमा सावधानी अपनाउनुपर्ने स्थिति सिर्जना भएको हुँदा त्यसले बलिउडप्रति आफूमा वितृष्णा जगाउने काम गर्को कश्यपको भनाइ छ । फिल्म निर्माणका प्रक्रियामा जोखिम लिन र नयाँ किसिमको सामग्री प्रस्तुत गर्न बलिउडलाई रुचि नभएको र त्यही कारण बलिउडका कलाकारहरू समेत सिर्जनात्मक कामको सट्टा विलाशी जीवनशैली र व्यावसायिक सफलताका पछाडि बढी आकृष्ट भएको उनको निष्कर्ष छ । यस्ता कुराले आफूलाई असन्तुष्ट बनाएकै कारण सहर छोडेको उनले बताएका छन् ।