सिड्नी — तामाङ समुदायले अस्ट्रेलियाको सिड्नी पारामाटामा सोनाम ल्होछार–२८६२ (घोडा वर्ष) विविध सांस्कृतिक कार्यक्रम गरी मनाएका छन् । 

तामाङ सोसाइटी अफ न्यू साउथ वेल्सको आयोजनामा शनिबार पारामाटास्थित रिभरसाइड थिएटरमा ल्होछार मनाइएको हो । कार्यक्रममा तामाङ सोसाइटी अफ एनएसडब्लूका पूर्वअध्यक्ष तथा समुदायका अग्रजहरूलाई सम्मान गरिएको थियो ।

कार्यक्रममा बोल्दै प्रमुख अतिथि जिहाद दिपले तामाङ समुदायले प्रवासमा आफ्नो भाषा, संस्कृति र परम्पराको संरक्षण तथा प्रवर्द्धनमा खेलेको भूमिकाको प्रशंसा गरे । उनले बहुसांस्कृतिक अस्ट्रेलियामा यस्ता सांस्कृतिक कार्यक्रमहरूले नेपाली समुदायको पहिचानलाई अझ मजबुत बनाउने बताए । नयाँ पुस्तालाई आफ्नो मौलिक संस्कृतिसँग जोडिराख्न यस्ता कार्यक्रमले महत्वपूर्ण भूमिका खेल्ने उनको भनाइ छ । 

सञ्जीव शर्माले तामाङ समुदायले अस्ट्रेलियामा आफ्नो संस्कृति जगेर्ना गर्न गरिरहेको प्रयास सराहनीय रहेको भन्दै यस्ता कार्यक्रमहरूले नेपाली समुदायबीच आपसी सद्भाव र एकता बलियो बनाउने विश्वास व्यक्त गरे । 

स्थानीय काउन्सिलर भद्र वाइबाले तामाङ सोसाइटी अफ न्यू साउथ वेल्सले समुदायको पहिचान जगेर्ना गर्न खेलेको भूमिकाको प्रशंसा गर्दै अस्ट्रेलियाको बहुसांस्कृतिक समाजमा नेपाली समुदायको सक्रिय सहभागिता गर्वको विषय भएको बताए । 

संस्थापक तथा तामाङ सोसाइटी अफ अस्ट्रेलियाका सल्लाहकार गणेश तामाङले तामाङ समुदायको एकता, भाषा, संस्कृति र धर्मको संरक्षण नै संस्थाको मूल उद्देश्य रहेको बताए । उनले नयाँ पुस्तालाई आफ्नो मौलिक पहिचानप्रति सचेत गराउन यस्ता कार्यक्रम निरन्तर आवश्यक रहेको उल्लेख गरे । 

तामाङ सोसाइटी अफ एनएसडब्लूका अध्यक्ष अविरल तामाङले कार्यक्रम सफल बनाउन प्रत्यक्ष तथा अप्रत्यक्ष रूपमा सहयोग गर्ने सम्पूर्ण सदस्य, स्वयंसेवक, प्रायोजक, कलाकार तथा दर्शकलाई धन्यवाद दिए । उनले तामाङ समाजको मूल आधार भाषा, संस्कृति र धर्मको संरक्षण र प्रवर्द्धन रहेको उल्लेख गर्दै भावी दिनमा अझ स्तरीय र व्यवस्थित कार्यक्रम गर्दै जाने प्रतिबद्धता व्यक्त गरे ।