शनिबार सम्पन्न निर्वाचनमा कुँवरले ६८३९ मतसहित अध्यक्षमा विजय प्राप्त गरे, १६ हजार मतमध्ये १३७०१ मत खसेका थिए।
What you should know
अस्ट्रेलिया — एनआरएनए अस्ट्रेलियाको अध्यक्षमा सन्तोष कुँवर निर्वाचित भएका छन् । निवर्तमान महासचिव कुँवरले अध्यक्षका प्रत्यासी भैरव ढकाल र संजीव गोर्खाली ढकाललाई पराजित गर्दै अध्यक्षमा जित हासिल गरेका हुन् ।
एनआरएनए अस्ट्रेलियाले शनिबार अनलाइनमार्फत ६ राज्य तथा दुई टेरिटोरीमा निर्वाचन सम्पन्न गरेको थियो । करिब १६ हजार मतमध्ये १३ हजार ७ सय १ मत खसेको थियो ।
निर्वाचन आयोगका प्रमुख डिल्ली ढकालका अनुसार अध्यक्षमा निर्वाचित क्युन्सल्यान्डका कुँवरले ६ हजार ८ सय ३९ मत ल्याएका छन् भने अध्यक्षका अर्का दुई प्रत्यासी पर्थका ढकालले ३ हजार ७ सय २७ मत र डार्बिनका गोर्खाली ढकालले २ हजार १ सय २५ मत ल्याएका थिए । कुँवरले अन्तर्रास्ट्रिय समन्वय समितिमा दरिलो मानिएको अस्ट्रेलियाको एनआरएनएलाई दुई वर्ष नेतृत्व गर्नेछन् ।
निर्वाचन नतिजाअनुसार उपाक्ष्यक्षमा बबिन मिश्र, महासचिवमा चुणामणि सापकोटा, सचिवमा कल्याण खड्का, कोषाध्यक्षमा निजन चौलागाईं निर्वाचित भएका छन् । यसैगरी अन्तर्राष्ट्रिय समन्वय समिति सदस्यमा बिष्णु तिवारी, दीपक अधिकारी, दीपक बस्नेत, हरिकृष्ण अधिकारी, निराजन पोखरेल, राजेश केसी, सुशील पोखरेल र साईबल न्यौपाने निर्वाचित भएका छन् ।
नारी निकुञ्ज अस्ट्रेलियाको संयोजकमा दक्षिण अस्ट्रेलियाकी रिज्नु अधिकारी निर्वाचित भएकी छिन् भने युवा संयोजकमा पुकार घिमिरे चुनिएका छन् ।
न्यु साउथ वेल्स राज्य संयोजकमा उषाकिरण बरिया पोखरेल निर्वाचित भएकी छिन् भने भिक्टोरियामा महादेव धानुक, दक्षिण अस्ट्रेलियामा थिर गुरुङ, पश्चिम अस्ट्रेलियामा हरिवंश सञ्जेल, नर्दन टेरिटोरीमा त्रिलोचन सापकोटा र राजधानी अस्ट्रेलियन क्यापिटल टेरिटोरीमा ललित मल्ल संयोजक पदमा निर्वाचित भएका छन् । यसपहिल्यै क्युन्सल्यान्डमा अतुल खड्का र तास्मानियामा सुजन वाग्ले निर्विरोध चयन भएका थिए । अध्यक्षमा विजयी बनेका कुँवरले सबैको साझा एनआरएनए बनाउने र सबैसँग मिलेर समुदायका लागि काम गर्ने प्रतिबद्धता जनाएका छन् ।
