जुम्ला — जुम्लामा महको भाउ प्रतिकेजी २ हजार ५ सय रुपैयाँ तोकिएको छ । प्रमुख जिल्ला अधिकारी तेजप्रकाश प्रसाईँको अध्यक्षतामा बसेको जिल्ला दररेट निर्धारण समितिले गत आर्थिक वर्षको तुलनामा यस वर्ष ५ सय रुपैयाँले महको मूल्य बढाएको हो । गत आर्थिक वर्षमा महको भाउ प्रतिकेजी २ हजार रुपैयाँ निर्धारण भएको थियो । 

सार्वजनिक खरिद नियमावली २०६४ को परिच्छेद १५ को नियम १४८(क) बमोजिम महको मूल्य तोकिएको जिल्ला प्रशासन कार्यालयले जनाएको छ । मौरीपालक किसान चन्दननाथ नगरपालिका–४ का नारायण चौलागाईले महको भाउ तोकिएपछि किसान उत्साहित बनेको बताए । ‘पहिले महको मूल्यमा एकरूपता थिएन। किसान आ-आफ्नै भाउमा मह बेचिरहेका थिए,’ चौलागाईंले भने, ‘गत वर्षदेखि जिल्ला दररेट निर्धारण समितिले मूल्य तोकिदिन थालेपछि अहिले बजार पनि राम्रो छ ।’ उनले लामो समय देखिएको मौरीपालक किसानको माग सम्बोधन भएकामा खुसी व्यक्त गरे । 

समितिले मह मात्र नभएर मौरीघारसमेतको मूल्य तोकेको छ । मौरीसहितको स्थानीय घारको मूल्य प्रतिगोटा १० हजार रुपैयाँ तोकिएको छ । गत आर्थिक वर्षमा घारको मूल्य ९ हजार तोकिएको थियो । मौरीबाहेकको स्थानीय घारको मूल्य गत वर्षको भन्दा घटेको छ । गत आर्थिक वर्षमा ६ हजार ५ सय रुपैयाँ तोकिएकामा यस वर्ष ६ हजार मात्र राखिएको हो । 

मौरीसहितको जुम्ली टपबार घार प्रतिगोटा १३ हजार, मौरीबाहेकको जुम्ली टपबार घार ८ हजार रुपैयाँ मूल्य निर्धारण भएको जिल्ला कृषि विकास कार्यालय जुम्लाका सूचना अधिकारी दीपेन्द्रसिंह धामीले जानकारी दिए। 

उनका अनुसार गत वर्ष क्रमशः घारको भाउ १२ हजार र ८ हजार रुपैयाँ थियो । समितिले कम्तीमा ९ फ्रेम भएको जुम्ली न्युटन मौरीको खालीघार प्रतिगोटा ५ हजार रुपैयाँ, ९ फ्रेम भएको सुपरसहितको मौरीको खाली घार प्रतिगोटा ७ हजार रुपैयाँ र मौरीको प्रतिफ्रेम १ हजार ५ सय रुपैयाँ तोकेको जिल्ला कृषि विकास कार्यालयले जनाएको छ ।