काठमाडौं — नेपालको सुनचाँदी व्यवसाय डिजिटल युगमा प्रवेश गरेको छ । मंगलबार आयोजित कार्यक्रबीच नेपाल सुनचाँदी रत्न तथा आभुषण महासंघले व्यवसायसँग सम्बन्धित वेबसाइट तथा मोबाइल एप सुरु गरेको हो ।

उक्त कार्यक्रममा नेपाल चेम्बर अफ कमर्सका अध्यक्ष कमलेशकुमार अग्रवालले महासंघले सुरु गरेको डिजिटल पहलले सुनचाँदी व्यवसायलाई आधुनिक, पारदर्शी र व्यवस्थित बनाउन महत्वपूर्ण योगदान पुग्ने विश्वास व्यक्त गरेका छन् । अध्यक्ष अग्रवालले सुनचाँदी व्यवसाय केवल व्यापार मात्र नभई नेपाली इतिहास, संस्कृति, परम्परा, कला र सभ्यतासँग जोडिएको जीवन्त सम्पदा भएको उल्लेख गरे । उनले नेपाली कालिगढहरूको सीप, मौलिक कला र परम्परागत डिजाइनलाई आधुनिक प्रविधि, ब्रान्डिङ तथा अन्तर्राष्ट्रिय बजारसँग जोड्न सके 'मेड इन नेपाल' गहनाले विश्व बजारमा विशिष्ट पहिचान बनाउन सक्ने धारणा राखे ।

उनले विश्व बजारमा सुनको मूल्य निरन्तर बढ्दै जाँदा त्यसको सकारात्मक र नकारात्मक दुवै असर व्यवसायमा परेको बताए । सरकारले आर्थिक वर्ष २०८३/८४ को बजेटमार्फत सुन, चाँदीबाट निर्मित गहनाको बिक्रीमा थप ०.५ प्रतिशत कर वृद्धिको निर्णयले वैधानिक व्यवसायमा थप दबाब सिर्जना गर्ने बताए । उनले करको दायरा विस्तार, प्रभावकारी कर प्रशासन तथा अवैध कारोबार नियन्त्रणमा जोड दिए । 

महासंघका अध्यक्ष किसान सुनारले परम्परागत सुनचाँदी व्यवसायलाई आधुनिक, व्यवस्थित र प्रविधिमैत्री बनाउने उद्देश्यले वेबसाइट र मोबाइल एप सञ्चालनमा ल्याइएको बताए । उनले महासंघ, प्रदेश र जिल्ला संघलाई एउटै डिजिटल प्लेटफर्ममा आबद्ध गरी सदस्यहरूको विवरण, सूचना प्रवाह, प्रशासनिक कार्य तथा तथ्यांक व्यवस्थापनलाई प्रविधिमार्फत सहज बनाउने लक्ष्य राखिएको जानकारी दिए ।