काठमाडौं — प्रधामन्त्री वालेन्द्र शाहले निजी क्षेत्रको साथमा अर्थतन्त्रमा सुधार गर्न चाहेको बताइएका छन् । उद्योग वाणिज्य महासंघ, नेपाल उद्योग परिसंघ र चेम्बर अफ कमर्शका प्रतिनिधिहरुसँग बुधबार भएको भेटमा प्रधानमन्त्री शाहले निजी क्षेत्रको साथमा आर्थिक सुधारको प्रतिबद्धता व्यक्त गरेका हुन् ।

निजी क्षेत्र र प्रधानमन्त्रीबीचको भेटवार्ता भर्खर सकिएको छ । करिब डेढघण्टा चलेको उक्त भेटमा निजी क्षेत्रका समस्या, अर्थतन्त्रको वर्तमान अवस्था, समाधानको उपायलगायत विषयमा खुलेर छलफल भएको महासंघका अध्यक्ष अञ्जन श्रेष्ठले बताए ।

‘प्रधानमन्त्री ज्यूले निजी क्षेत्रलाई अर्थतन्त्रको ड्राइभिङ सिटमा राखेर विद्यमान समस्या सुधार गर्न चाहेका बताउनु भएको छ । यसका लागि निजी क्षेत्रका सबै समस्या समाधान गर्ने प्रतिबद्धता आएको छ,’ अध्यक्ष क्षेष्ठले भने । भेटमा व्यवसायीले केही उद्योगी व्यवसायीलाई हिराससतमा राखेको, निजी क्षेत्र त्रासमा रहेको र आत्मविश्वास बढ्न नसकेको लगायत विषय पनि उठाएका थिए । त्यसको प्रतिउत्तरमा प्रधानमन्त्री शाहले कसूरको आरोपका आधारमा केही उद्योगी व्यवसायीमाथि अनुसन्धान भए पनि समग्र निजी क्षेत्रप्रति सरकार सकारात्मक रहेको र थप लगानीका लागि निजी क्षेत्रलाई प्रोत्साहन गर्ने नीति सरकारको रहेको बताएको अध्यक्ष श्रेष्ठले जानकारी दिए ।