काठमाडौँ — नेपाल वायुसेवा निगमको काठमाडौं–जापान (नारिता) नियमित उडान मंगलबार राति प्राविधिक समस्याका कारण रद्द भएको छ। निगमले आफ्नो ६८औँ वार्षिकोत्सव मनाउनुभन्दा अघिल्लो रात भएको उडान रद्दमा दुवैतर्फका गरी ५ सय २ यात्रु प्रभावित भएका छन्।

निगमको आरए ४३३ नम्बरको उडानमार्फत २५५ यात्रु जापानको नारितातर्फ प्रस्थान गर्ने तयारीमा थिए । यात्रुलाई बोर्डिङ गराएर जहाज उडानका लागि अन्तिम तयारी भइरहेका बेला विमानमा प्राविधिक खराबी देखिएपछि उडान रद्द गरिएको हो । निगमका एक कर्मचारीका अनुसार विमानको फ्लाइट कन्ट्रोल प्रणाली मा समस्या देखिएपछि उडान स्थगित गरिएको हो । त्यसपछि काठमाडौंमा रहेका सबै यात्रुलाई राती विमानस्थलबाट होटलमा राखिएको छ ।

उता जापानको नारिताबाट काठमाडौं आउनुपर्ने आरए ४३४ नम्बरको फर्किने उडान पनि प्रभावित भएको छ। उक्त उडानका २४७ यात्रु लाई पनि जापानमै होटलमा बस्ने व्यवस्था मिलाइएको निगमले जनाएको छ ।