पर्सा — वीरगन्ज महानगरपालिकाले आर्थिक वर्ष २०८३/०८४ का लागि ४ अर्ब ४२ करोड ३४ लाख ६९ हजार रुपैयाँको अनुमानित बजेट सार्वजनिक गरेको छ । चालु आर्थिक वर्षको तुलनामा यो करिब १ अर्ब २० करोड रुपैयाँ बढीको बजेट हो । महानगरले शिक्षा, स्वास्थ्य, सरसफाइ, कृषि, पर्यटन, उद्योग तथा पूर्वाधार विकासलाई बजेटमा प्राथमिकता दिइएको जनाएको छ ।

बुधबार सम्पन्न नगरसभाको २०औँ अधिवेशनमा कार्यवाहक नगरप्रमुख इम्तियाज आलमका तर्फबाट नगरकार्यपालिका सदस्य जगत साह कानुले आगामी आर्थिक वर्षको आय–व्यय विवरण प्रस्तुत गरेका थिए । चालु आर्थिक वर्ष २०८२/०८३ का लागि महानगरको कुल बजेट ३ अर्ब २२ करोड ४८ लाख ४९ हजार रुपैयाँ रहेको थियो ।

प्रस्तुत बजेटअनुसार चालू खर्चतर्फ २ अर्ब ४० करोड ३४ लाख ६९ हजार रुपैयाँ विनियोजन गरिएको छ, जुन कुल बजेटको ५४ दशमलव ३ प्रतिशत हो । यस्तै, पुँजीगत खर्चतर्फ १ अर्ब ९६ करोड ९९ लाख ८४ हजार रुपैयाँ अर्थात् ४४ दशमलव ६ प्रतिशत रकम छुट्याइएको छ । वित्तीय व्यवस्थापनका लागि ५ करोड रुपैयाँ अर्थात् १ दशमलव १ प्रतिशत बजेट विनियोजन गरिएको छ।

महानगरले आगामी वर्षको खर्च व्यवस्थापनका लागि संघीय सरकारबाट प्राप्त हुने अन्तरसरकारी वित्तीय हस्तान्तरणलाई प्रमुख स्रोतका रूपमा राखेको छ । बजेटका लागि संघीय वित्तीय हस्तान्तरणबाट १ अर्ब ९८ करोड २९ लाख रुपैयाँ प्राप्त हुने अनुमान गरिएको छ । यस्तै, आन्तरिक राजस्वबाट १ अर्ब ४८ करोड रुपैयाँ संकलन गर्ने लक्ष्य राखिएको छ ।

संघीय राजस्व बाँडफाँटबाट २४ करोड ६८ लाख ८३ हजार रुपैयाँ, प्रदेश सरकारको अन्तरसरकारी वित्तीय हस्तान्तरणबाट ५ करोड २८ हजार रुपैयाँ तथा प्रदेश राजस्व बाँडफाँटबाट १ करोड ६७ लाख १४ हजार रुपैयाँ प्राप्त हुने अनुमान गरिएको छ । घरजग्गा रजिस्ट्रेसन शुल्कबाट ४५ करोड रुपैयाँ आम्दानी हुने प्रक्षेपण गरिएको छ भने गत वर्षको नगद मौज्दातबाट ४ करोड ६९ लाख ४४ हजार रुपैयाँ र नगर विकास कोषबाट १५ करोड रुपैयाँ स्रोत व्यवस्थापन गरिने उल्लेख गरिएको छ।