काठमाडौँ — अर्थमन्त्री स्वर्णिम वाग्लेले आगामी आर्थिक वर्ष २०८३/८४ को बजेटले विगतदेखि सञ्चालनमा रहेका गरिबमुखी तथा लोककल्याणकारी कार्यक्रमलाई निरन्तरता दिएको बताएका छन् । बुधबार अर्थ समितिको बैठकमा उठेका प्रश्नहरूको जवाफ दिँदै उनले अघिल्ला सरकारहरूले ल्याएका त्यस्ता अधिकांश कार्यक्रमलाई निरन्तरता दिएको बताएका हुन् । 

‘यसअघि सरकारहरूले गरिबका नाममा र लोककल्याणकारी राज्यका नाममा ल्याएका कार्यक्रमहरू सबै यथावत छन् । अब कि त तपाईंहरूले स्वीकार गर्नुपर्‍यो कि विगतमा ल्याइएका कार्यक्रमहरूको कुनै आधार थिएन वा ती गरिबमुखी थिएनन् । अन्यथा, तीमध्ये अधिकांश कार्यक्रमलाई हामीले निरन्तरता दिएका छौँ,' उनले भने । 

अर्थमन्त्री वाग्लेका अनुसार अनुदानमुखी प्रणालीलाई उत्पादनमुखी बनाउने प्रयास गरिएको छ । व्यक्तिगत वा सामूहिक रूपमा करार खेतीमार्फत पनि किसानले यो कार्यक्रमबाट लाभ लिन सक्नेछन् । उक्त कार्यक्रमलाई प्रारम्भिक रूपमा परीक्षण (पाइलट) का रूपमा लागू गरिएको र सफल भए विस्तार गरिने उनको भनाइ थियो ।