बागलुङ — विकासे र हाइब्रिड जातको खेती लगाउने होड चलेका बेला बागलुङ नगरपालिका–१३ ले भने रैथाने धान जोगाउने अभियान ल्याएको छ । वडाले निर्णय गरेर परम्परागत जातको धान लगायतका बाली लगाएमा किसानलाई अनुदानस्वरूप पुरस्कृत गरिने व्यवस्था गरेको हो । 

वडाध्यक्ष नारायण पौडेलले वडाभित्रका किसानले रैथाने धान संरक्षण गरेमा अनुदान दिने कार्यक्रम बनाएका हुन्। अघिल्लो वर्षदेखि नै यो नीति बनाएर किसानलाई अनुदान दिएपछि किसान पनि रैथाने जातको बाली संरक्षणमा अग्रसर भएका छन् । वडा कार्यसमितिले निर्णय गरेर रैथाने जातका बालीका लागि तोकिएका ५ थरी धानको उत्पादनलाई प्रोत्साहन गर्ने कार्यक्रमसमेत बनाएको हो । वडाको आर्थिक विकास तथा कृषि क्षेत्रको बजेटबाटै रैथाने प्रकृतिका धान उत्पादन गर्दा प्रतिमुरी एक/एक हजार रुपैयाँ अनुदान दिइने भएको हो । अघिल्लो वर्ष ४० किसानले यस्तो अभियानमा अनुदान पाएका थिए ।

परम्परागत रूपमा रैथाने जात मानिने जर्नेली, अनाती, झिनुवा, रमनी र आँगा जातको धान लगाउने किसानलाई उक्त अनुदान दिइएको हो । धान थन्क्याउने समयमा किसानको खेतमै पुगेर धान भरेपछि वडाध्यक्षले नगद दिने गरेका छन् । ‘बाली भित्र्याउने दिन किसानले जानकारी गरेपछि वडा समितिका पदाधिकारी पुगेर हेर्ने र प्रोत्साहन रकम दिने गरिएको छ,’ पौडेलले भने, ‘यो व्यवस्थापछि किसान पनि खुसी भएका छन् ।’ हाइब्रिड जातको तुलनामा रैथाने जातको उत्पादन कम हुन्छ । किसान प्रोत्साहित नभएमा थोरै उत्पादन हुने खेती लगाउन छाडेका छन् ।