नेपाल वैदेशिक रोजगार व्यवसायी संघको विशेष साधारण सभा जेठ २४ गते काठमाडौंमा हुँदैछ ।
काठमाडौँ — नेपाल वैदेशिक रोजगार व्यवसायी संघको नयाँ नेतृत्वको लागि हुन गइरहेको चुनावमा मेघनाथ भुर्तेलको नेतृत्वको आफ्नो प्यानल शनिबार घोषणा गरेको छ । संघको विशेष साधारण सभा जेठ २४ गते काठमाडौंमा हुँदैछ ।
कांग्रेस निकट लोकतान्त्रिक वैदेशिक रोजगार व्यवसायी एसोसिएसनले संघका पूर्वमहासचिव भुर्तेलको नेतृत्वमा चुनावमा भाग लिन लागेको हो ।
प्रथम उपाध्यक्षमा कर्णराज कटुवाल, द्वितीय उपाध्यक्षमा रविन मेगाले मगर, तृतीय उपाध्यक्षमा लक्ष्मण पौडेल, महासचिवमा अमर तिवारी, सचिवमा रामकाजी भ्लोन, कोषाध्यक्षमा विद्यारत्न बज्राचार्यलाई चुनावी मैदानमा उतारिएको हो ।
यस्तै, सदस्यहरूमा राजेश मैनाली, कैलाश पाठक, देउबहादुर गौतम (सविन), टंकप्रसाद पंगेनी, गीता राउत, भीममाया कार्की, दीक्षा थपलिया, रोशना निरौला, दिपककुमार देव र हिरालाल गौडेल रहेका छन् ।
भुर्तेलले वैदेशिक रोजगारको क्षेत्रलाई पारदर्शी बनाउने भन्दै १० बुँदे एजेन्डा सार्वजनिक गरेका छन् । जसमा श्रमिक र व्यवसायी दुवैको हित संरक्षण हुने स्पष्ट नीतिगत व्यवस्था देखि वास्तविक लागत शुल्क बनाउन सरकार र सरोकारपक्षसँग समन्वय गर्ने बताए ।
भुर्तेलले सरकार, व्यवसायी र श्रमिक प्रतिनिधिबीच नियमित संवाद संयन्त्र स्थापना गरी साझा समस्याको साझा समाधान खोज्ने तथा त्रिपक्षीय सहकार्यलाई संस्थागत गर्ने प्रतिबद्धता जनाएका छन् ।
जिल्ला प्रशासन कार्यालय काठमाडौंले भुवनसिंह गुरुङको नेतृत्वमा रहेको बहुमत पदाधिकारीले राजीनामा दिएपछि संघको विधान अनुसार स्वतः गुरुङ कार्यसमिति विघटन भएको भन्दै संघको विशेष साधारणसभा गर्न पत्र पठाएको थियो । त्यसअनुसार गुरुङको कार्यकाल समाप्त हुनुभन्दा एक वर्ष अगाडि नै विशेष महाधिवेशन हुन लागेको हो ।
