आँचल कुँवरले दराज नेपालको प्रबन्ध निर्देशक पद छाडेपछि बेन यी कार्यवाहक निर्देशक बन्ने भएका छन् भने रतिश लुँइटेल सीसीओमा नियुक्त भएका छन् ।
काठमाडौँ — ई-कमर्स प्लाटफर्म दराज नेपालको प्रबन्ध निर्देशक पदबाट आँचल कुँवरले राजिनामा दिएकी छन् । कम्पनीको कार्यवाहक प्रबन्ध निर्देशकका रूपमा बेन यी नियुक्त्त भएका छन् । उनी हाल दराज बंगलादेशको प्रबन्ध निर्देशक र समूहको मुख्य व्यावसायिक अधिकृत हुन् ।
दराज नेपालको मुख्य व्यावसायिक अधिकृत (सीसीओ) का रूपमा रतिश लुँइटेललाई नियुक्त गरिएको विज्ञप्तीमा उल्लेख छ । कुँवरले राजीनामा दिए पनि आगामी केही महिना कम्पनीलाई सल्लाहकारका रूपमा सहयोग गर्ने दराजले जनाएको छ । यो नयाँ नेतृत्व परिवर्तन आगामी २०८३ असार १७ गतेदेखि लागू हुने भनिएको छ ।
विगत साढे चार वर्षयता कुँवरले दराजको नेतृत्व सम्हालेकी थिइन् । ‘उनको नेतृत्वमा दराज नेपालको व्यवसाय दोब्बरभन्दा बढी विस्तार भएको छ,’ दराजले भनेको छ, ‘कम्पनीको ग्राहक संख्या ३० लाखभन्दा माथि पुगेको छ भने विक्रेता सञ्जाल २४ हजारभन्दा बढी पुगेको छ, जसमध्ये ८५ प्रतिशत साना तथा मझौला उद्योग छन् । साथै, दराजको पहुँच देशभरका १४० भन्दा बढी स्थानसम्म विस्तार भएको छ ।’
यी उपलब्धिसँगै कुँवरले नेपालमा उद्यमशीलता र डिजिटल व्यापार प्रवद्र्धनमा महत्वपूर्ण भूमिका खेलेको दराजले उल्लेख गरेको छ । नेतृत्व हस्तान्तरणलाई सहज बनाउन कुँवरले आगामी पुस १६ गतेसम्म सल्लाहकारको भूमिका निर्वाह गर्ने भनिएको छ ।
