काठमाडौँ — नेपाली पर्वतारोही निर्मल पुर्जा (निम्सदाइ)ले अक्सिजनबिना सगरमाथा-ल्होत्से आरोहण सबैभन्दा कम (शिखर समय)मा गर्दै आफ्नै विश्व कीर्तिमान तोडेको दाबी गरेका छन् । उनले २०८३ जेठ १३  गते दिउँसो २ बजेर २० मिनेटमा सगरमाथा र १४ गते बिहान ४ बजेर २ मिनेटमा ल्होत्से आरोहण गरेका थिए । 

पुर्जाले मंगलबार कान्तिपुरलाई दिएको प्रारम्भिक विवरणअनुसार सगरमाथा र ल्होत्सेको शिखर यसपटक अक्सिजनबिना १३ घण्टा ४२ मिनेट १७ सेकेन्ड मा आरोहण सम्पन्न गर्दै नयाँ कीर्तिमान कायम गरेका हुन् । सेभेन समिट ट्रेक्सका महाप्रबन्धक तथा हिमाली तथ्यांकका अनुसन्धानकर्ता थानेश्वर गुरागाईंका अनुसार यसअघि उनले सन् २०२२ मा सगरमाथा र ल्होत्से अक्सिजनबिना २५ घण्टा १ मिनेटमा आरोहण गरी विश्व कीर्तिमान बनाएका थिए । पुर्जाले यसपटक आफ्नै पुरानो कीर्तिमान उल्लेखनीय अन्तरले सुधार गरेका छन् ।

गुरागाईंका अनुसार सगरमाथा आरोहणसँगै पुर्जाले मंगलबारसम्म ८ हजार मिटरभन्दा अग्ला हिमालहरूमा आफ्नो ५५ औं सफल आरोहण पूरा गरेका छन् । जसमा ५२ रियल समिट (चुचुरोसम्म) र तीनवटा (नट ट्रु समिट) चुचुरो नजिक गरी ५५ वटा आरोहण गरिसकेका छन् । तीमध्ये २७ वटा आरोहण कृत्रिम अक्सिजनको प्रयोगबिना सम्पन्न गरेका छन् ।

यसपटक प्रतिकूल मौसमका कारण निर्धारित योजना परिवर्तन गर्दै उनको नेतृत्वमा रहेका २८ जना सदस्यले पनि सफलतापूर्वक दिउँसो सगरमाथा र अर्को बिहान ल्होत्से शिखर आरोहण गरेका थिए । पुर्जाले आरोहणलाई आफ्नो पेशा नै भएकाले केही वर्ष अझै निरन्तरता दिने बताएका छन् । 

अब यतिबेला मकालु र कञ्चनजंघा हिमाल आरोहणको तयारीमा छन् । नेपालका अभियानहरू सम्पन्न गरेपछि जुन १० तिर पाकिस्तानको केटु हिमालतर्फ जाने उनको योजना रहेको छ।