काठमाडौँ — सरकारले नेपाललाई आर्टिफिसियल इन्टेलिजेन्स (एआई) युगमा आत्मविश्वासका साथ प्रवेश गराउन विशेष पहल सुरू गर्ने घोषणा गरेको छ । अर्थमन्त्री स्वर्णिम वाग्लेले संघीय संसद्‍मा शुक्रबार प्रस्तुत गरेको आगामी आर्थिक वर्षको बजेटमा यससम्बन्धी विभिन्न कार्यक्रम उल्लेख छन् । 

बजेटमा काठमाडौंको स्युचाटारमा देशकै पहिलो सार्वभौम एआई कम्प्युट स्थापना गर्ने घोषणा गरिएको छ। ‘यसका लागि सरकारले हजारौँ एआई प्रोसेसिङ युनिटहरू खरिद गर्नेछ,’ वाग्लेले भने, ‘स्वच्छ जलविद्युत ऊर्जालाई उच्च मूल्यको एआई कम्प्युट सेवामा रूपान्तरण गरिनेछ ।’ एआई र स्टार्टअपहरूलाई सहुलियतपूर्ण कम्प्युटर क्षमता उपलब्ध गराइने उनले बताए । 

नेपालको अपार ऊर्जा शक्तिलाई एआईको प्रयोगमार्फत सीपयुक्त रोजगारी, डिजिटल निर्यात र एआईमा आधारित आर्थिक रूपान्तरणको जग निर्माण गर्न उपयोग गरिने लक्ष्य सरकारले राखेको छ ।