सेवा–सुविधा नपाउँदै आठ जना कर्मचारीको मृत्यु भएको बताउँदै उनले समस्या समाधान नभएकाले आन्दोलन गर्न बाध्य भएको बताए । उद्योगमा कार्यरत श्रमिक, कर्मचारीहरुको १४ महिनाको ८ करोड ८० लाख ५३ हजार रुपैयाँ तलवसुविधा भुक्तान हुन बाँकी रहेको उनले बताए । उद्योगले २०८१ चैतदेखि कर्मचारीलाई तलब दिन बाँकी रहेको जनाएको छ । 

उता, उदयपुर सिमेन्ट उद्योग लिमिटेडले उद्योग तथा वाणिज्य मन्त्रालयलाई पठाएको पत्रमा पनि कर्मचारीको बाँकी दायित्वको कुरा उठाउँदै रकम व्यवस्था गरिदिन आग्रह गरेको छ । उद्योगले कच्चा पदार्थ खरिद गर्न नसकिएको, बिक्री वितरण घटेको र उत्पादन न्यून भएकाले नियमित तलब र अवकाश सुविधाको भुक्तानीमा कठिनाइ भएको बताएको छ ।

कम्पनीको विवरण अनुसार कार्यरत र अवकाशप्राप्त कर्मचारीसँग सम्बन्धित दायित्व करिब ३२ करोड ७९ लाख १२ हजार ९ सय ६५ रुपैयाँ ५० पैसा पुगेको छ । उद्योगले तलब, सञ्चय कोष, नागरिक लगानी कोष, अतिरिक्त कार्य समय भत्ता, बिमा, विदा मूल्यांकन, सट्टा विदा, महंगी भत्तालगायत विभिन्न शीर्षकमा ठूलो रकम बाँकी रहेको जनाएको छ । उद्योगले पछिल्लो ९ महिनामा सिमेन्ट बिक्री गरेर ९ करोड ६५ लाख आम्दानी गरेको उद्योगका लेखा प्रमुख प्रकाश पोखरेलले बताए । गत फागुन १ देखि उद्योगको उत्पादन बन्द छ ।