काठमाडौँ — सरकारले आगामी आर्थिक वर्षको बजेटमा प्राथमिकीकरण गर्न खोजेको कुराहरु नीति तथा कार्यक्रमबाट प्रस्ट भइसकेको अर्थ सचिव घनश्याम उपाध्यायले बताएका छन् । कान्तिपुर इकोनमिक समिट २०२६ मा 'बजेटमा अंक होइन, अर्थको खोजी' शीर्षकको दोस्रो सेसनमा बोल्दै उनले सरकारको पहिलो प्राथमिकता सुशासन नै रहेको प्रस्ट पारे । 

'त्यसपछि आर्थिक सुधार र पूर्वाधार विकासलाई प्राथमिकीकरण गर्न खोजिएको छ,' उनले भने, 'यसको पिलरहरु भनेको लगानी हो । हिजोका दिनमा सरकारले लिएका नीतिहरु सिमेन्ट उत्पादनमा आत्मनिर्भर भइरहेको बताउँदै उनले १० वर्षमा जलविद्युत्‌मा १८ घण्टा लोडसेडिङको अवस्थाबाट निर्यात गर्ने अवस्थामा पुगेको सुनाए । 

'यो सरकारको सहज नीतिका कारण गर्दा भएको हो,' उनले भने, 'अर्थतन्त्रको आयातलाई घटाउने र जुन क्षेत्रहरू छन्, त्यो क्षेत्रमा नीतीहरुमार्फत सहजीकरण गर्ने काम सरकारबाट भएको छ ।' उनले अहिलेको अवस्थामा नीजी क्षेत्रको आत्मबल बढाउन जरुरी रहेको बताए । 'यसमा दुईवटा कुरा हुन्छ एउटा निजी क्षेत्रले सुरक्षाको ग्यारेन्टी खोज्नु भएको छ । त्यो सुरक्षा भनेको सम्पत्तिको सुरक्षा, व्यक्तिको सुरक्षा हो,' उनले भने, 'निजी क्षेत्रलाई सार्वजनिक पूर्वाधार विकासमा पनि सरकारसँगसँगै लैजाने, नाफामूलक आयोजनाहरुमा लैजान्छौँ ।'