विकसित राष्ट्रतर्फको यात्रामा जाँदै गर्दा यस्तो कार्यले व्यवसायीलाई हतोत्साहित बनाउने समेत उनले बताए । 'तीन पुस्ता यही बसेर उद्योग धन्दा गरेको, १२ सयलाई रोजगारी दिने मान्छेलाई एक डेढ महिना थुन्दा केही पनि फरक पर्दैन, तर उसको सामाजिक प्रतिष्ठा, उसलाई समाजले हेर्ने दृष्टिकोण, बालबच्चाको दृष्टिकोण र उद्यमीको काम गर्ने जोश जाँगरमा त्रासको वातावरण बन्छ,' उनले भने, 'हामी अविकसित राष्ट्रबाट विकसित राष्ट्रतर्फ जाँदै गर्दा यस्तो कार्यले व्यवसायीलाई हतोत्साहित बनाउने काम गर्छ ।' 

'कुनैपनि राष्ट्र विकास हुन सरकार र निजी क्षेत्रबीच पार्टनरसिपमा काम नभएसम्म अर्थतन्त्रको विकास गर्न सकिँदैन,' उनले भने, 'सरकार भनेको मध्यस्थताकर्ता मात्र हो । जतिपनि विकासको काम गर्नुपर्ने हो, त्यो निजी क्षेत्रले गर्ने हो । त्यसैले निजी क्षेत्रका व्यवसायीलाई थुन्ने कामले राज्यलाई राम्रो भन्दा नराम्रो हुन्छ जस्तो लाग्छ ।' अहिले काम गर्ने उच्च जोशका साथ बनेको सरकारको जोश जाँगरमा ह्रास आउने जोखिम हुने उनले बताए । उनले भने, 'उद्योग धन्दा राज्यले गरेर साध्य छैन । यो जनता वा व्यवसायीले नै गर्ने काम हो । यसमा अभिभावकका रुपमा सरकारले नेतृत्व लिनु पर्छ ।'