पोखरा — माछापुच्छ्रेको छायाँ मुसुक्क हाँस्ने फेवातालको किनार । चैतको न्यानो हावा र नयाँ वर्षको उमंग । पोखरा यतिबेला आफ्नै पुरानो लय र उत्सवको तयारीमा जुटेको छ । होटल संघ पोखराले २१ औं फेवा नव वर्ष महोत्सवको तयारी तीव्र बनाएको हो । 

२९ चैतदेखि १ वैशाखसम्म लेकसाइडमा हुने महोत्सव पोखराको पर्यटनले कोरेको दुई दशक लामो गौरवपूर्ण यात्राको निरन्तरता पनि हो । वि.सं. २०६० को दशकको सुरुवातमा जब देश द्वन्द्व र राजनीतिक अस्थिरताको चपेटामा थियो, पोखराको पर्यटन सुस्ताएको थियो । त्यही बेला पर्यटन, संस्कृति र खानालाई एउटै थलोमा पस्केर पर्यटक तान्ने उद्देश्यले सुरू भएको यो सडक महोत्सवले २१ औं संस्करणसम्म आइपुग्दा एउटा बलियो इतिहास रचिसकेको छ ।

बिहीबार पोखरामा आयोजित पत्रकार सम्मेलनमा होटल संघ पोखराका अध्यक्ष एवं महोत्सव संयोजक लक्ष्मण सुवेदीले उत्साहजनक तथ्यांक सुनाए । ‘यसपालि महोत्सवमा हामीले तीन लाख आन्तरिक तथा बाह्य पर्यटक पोखरा भित्रिने आकलन गरेका छौं,’ उनले भने, ‘होटलहरूको अकुपेन्सी ९० प्रतिशतभन्दा माथि पुग्ने हाम्रो विश्वास छ ।’

पोखराको पर्यटनलाई पुनर्जीवन दिन संघले ‘जाऔं है पोखरा’ अभियान लिएर पूर्वी नेपालका सहर र लुम्बिनी प्रदेशसम्म पुगेर निम्तो बाँडिसकेको छ । महोत्सवलाई थप आकर्षक बनाउन संघले पर्यटकका लागि विशेष प्याकेजहरूको घोषणा गरेको छ । संघमा आबद्ध होटलहरूले प्रकाशित दररेटमा २५ प्रतिशतसम्म छूट दिने भएका छन् । ई–सेवामार्फत होटल बुकिङ गर्दा १० प्रतिशत क्यासब्याकको व्यवस्था गरिएको छ ।

लेकसाइडको खहरेचोकदेखि सहिद चोकसम्मको करिब साढे तीन किलोमिटर सडक क्षेत्र उत्सवमय बन्नेछ । यसपल्ट महोत्सवको मुख्य आकर्षण प्रदेशस्तरीय मौलिक तथा रैथाने खानाको प्रदर्शनी रहनेछ । ‘हामी आधुनिकतासँगै आफ्नो मौलिकता र इतिहास जोगाउन चाहन्छौं,’ अध्यक्ष सुवेदी थप्छन्, ‘त्यसैले पञ्चैबाजा प्रतियोगिता र मौलिक झाँकीहरूलाई प्राथमिकता दिएका छौं ।’ 

महोत्सवको औपचारिक सुरुआत हुनुअघि खहरेबाट निकालिने विविध जातजातिको झाँकीले अम्बोटमा पुगेर उद्घाटन समारोहको रूप लिनेछ । लोकदोहोरी, पप कन्सर्ट र पर्यटक दौड प्रतियोगिताले लेकसाइडको सडकलाई थप गुञ्जायमान बनाउने आयोजकको विश्वास छ ।