काठमाडौँ — अर्थमन्त्री डा.स्वर्णिम वाग्लेले अब निजी क्षेत्रले घुस खुवाउन, कामकाजमा लाइन लाग्न र बिनाकारण थुनिनु नपर्ने बताएका छन् । नेपाल उद्योग वाणिज्य महासंघको प्रतिनिधीहरुसागको भेटघाटमा सोमबार अर्थमन्त्री वाग्लेले सरकार निजी क्षेत्रमैत्री भएकाले ढुक्क भएर लगानी विस्तार गर्न र रोजगारीका अवसर सृजना गर्न आग्रह गरेका हुन् ।

‘म घुस खान आएको होइन, कसैलाई खान पनि दिन्नँ । म अर्थतन्त्रको हवाइजहाज मोडेर देशलाई नयाँ गतिमा लैजान आएको हुँ,’ उनले भने, ‘निजी क्षेत्रले अब दुःख पाउँदैन, हामी तपाईंहरूको सहयात्री हौं । अब घुस खुवाउन पर्दैन, लाइन लाग्न पर्दैन, बिनाकारण निजी क्षेत्रका मानिस थुनिनु पर्दैन ।’

निजी क्षेत्रले आर्थिक बेइमानी गरेको अवस्थामा सरकारले आर्थिक जरीवानामा गर्ने पनि अर्थमन्त्री वाग्लेले बताए ।  यसकारण गलत गरेको अवस्थामा उद्योगी व्यवसायीलाई आर्थिक जरिवाना गर्ने तर थुन्ने काम नगर्ने उनले बताएका हुन् ।