पश्चिम एसियाको द्वन्द्वले ढुवानी मार्गहरूमा अवरोध सिर्जना हुँदा सामानको लागत बढेको र समयमा सामान नपुग्ने समस्या देखिएको एडीबीको विश्लेषण छ । यसले ऊर्जा क्षेत्रमा मात्र नभई कृषि र खाद्य उत्पादनमा प्रयोग हुने रासायनिक मल र पेट्रोकेमिकल्सको आपूर्तिमासमेत ठूलो जोखिम बढाएको छ । पर्यटन र रेमिट्यान्समा निर्भर अर्थतन्त्र भएका देशहरूमा यसले असर पार्न सक्ने बैंकले चेतावनी दिएको छ ।

एडीबीले विश्व बजारको अस्थिरता र बढ्दो महँगीलाई नजिकबाट नियालिरहेको उल्लेख गरेको छ । प्रभावित देशहरूको वित्तीय सन्तुलन कायम राख्न र विपन्न नागरिकलाई जोगाउन बैंकले सरकारहरूलाई बजेटरी सहयोग उपलब्ध गराउने तयारी गरेको जनाएको छ । यसका लागि बैंकले गम्भीर असर परेका सदस्य राष्ट्रहरूसँग तत्काल आवश्यक सहयोगका विषयमा छलफल सुरु गरिसकेको विज्ञप्तिमा उल्लेख छ । बैंकले निजी क्षेत्र र अन्य विकास साझेदारहरूसँग मिलेर आर्थिक स्थिरता कायम गर्न काम गर्ने प्रतिबद्धता पनि जनाएको छ ।