पाल्पा — पाल्पाको गल्धामा उत्पादन भएको सेतो सिमी यस वर्ष पनि युरोप निर्यात भएको छ । निस्दी गाउँपालिका–५ गल्धामा उत्पादन भएको रैथाने सेतो सिमी अर्गानिक प्रमाणित भएपछि गत वर्षदेखि युरोप निर्यात भएको हो ।

गल्धाको ढुंगानाबेंसीस्थित गल्धा सामाजिक उद्यमी महिला सहकारी संस्थामार्फत् किसानले सेतो सिमी संकलन गरेका थिए । यस वर्ष नेदरल्याण्डबाट ४० हजार किलोको माग आएकोमा ३६ हजार ३३० केजी  पठाउन सफल भएको गल्धा सामाजिक उद्यमी महिला सहकारीकी अध्यक्ष अममाया थापा मश्राङ्गीले बताइन् । यस वर्ष करिब ८० लाख रुपैयाँको सिमी निकासी गर्न सफल भएका हुन् ।

सहकारीले गत वर्ष पनि झण्डै २० हजार किलो सेतो सिमी युरोप पठाएको उनले बताइन् । उत्पादन कम भएकाले माग गरेको परिमाण पठाउन नसकिएको अध्यक्ष मश्राङ्गीले बताइन् । बिचौलिया व्यापारीसँग प्रतिस्पर्धा गर्नुपर्ने भएकाले किसानले केही रकम महंगोमा बिक्री गर्दा परिमाण पुग्न नसकेको उनले बताइन् । 

युरोपलगायत तेस्रो मुलुक निर्यात गर्न अकिस्टा नेपालसँगको साझेदारी रहेको सहकारीकी व्यवस्थापक डिलमाया थापाले बताइन् । अकिष्टाले अर्गानिक प्रमाणित गरेर सिमी युरोपलगायत अन्य मुलुकमा पठाउने गरेको उनले बताइन् । सिमी निर्यात भएसँगै यहाँका किसानले भाउसमेत राम्रो पाएको बताएका छन् । विगतमा १ सय ३० मा बिक्री गर्ने किसानले अहिले १ सय ७५ रुपैयाँ किलोमा सेतो सिमी सहकारीले खरिद गरेको छ । 

विदेश निर्यात गर्ने संस्थाले ग्रडिङ गरेको सिमी २ सय २० रुपैयाँ केजीमा खरिद गरेको छ । ‘ग्रेडिङ गर्दा केही किलो घट्ने हुन्छ,’ व्यवस्थापक सारुले भनिन्, ‘सहकारी र किसानलाई फाइदै भएको छ ।’ विदेश निर्यात हुन थालेपछि किसानलाई सहज भएको छ । सहकारीमार्फत् भएको कारोबारको पैसासमेत डुब्दैन भन्नेमा किसान ढुक्क छन् । ग्रेडिङ र प्याकेजिङ गरेर पठाइएको उनले बताइन् ।