काठमाडौँ — २४ भदौमा प्रदर्शनका क्रममा क्षति पुगेको २२ भूमिसुधार तथा मालपोत कार्यालय र १४ वटा नापी कार्यालय सञ्चालनमा आइसकेका छन् । प्रदर्शनका क्रममा मुलुकका १० वटा मालपोत कार्यालयमा पूर्ण रूपमा क्षति पुगेको थियो । क्षति पुगेका कार्यालय असोजमै सञ्चालनमा आइसकेको भूमि व्यवस्थापन तथा अभिलेख विभागले जनाएको छ । 

विभागका अनुसार भूमिसुधार तथा मालपोत कार्यालय, धनगढी कैलाली, नेपालगन्ज बाँके, घोराही दाङ र विराटनगर मोरङ र मालपोत कार्यालय, तुलसीपुर दाङ, पोखरा कास्की, भरतपुर चितवन, खैरहनी चितवन, कलंकी काठमाडौं र बुटवल रूपन्देही पूर्ण रूपमा क्षति भएको थियो । क्षति भएका कार्यालयमा नष्ट भएका जग्गाधनी दर्ता स्रेस्ता, रोक्का अभिलेख तयार गर्न विभागले परिपत्रसमेत गरेको थियो । जनताको जीवनसँग प्रत्यक्ष रूपमा जोडिएकाले असोजदेखि नै काम सुरु गरिसकेको विभागका प्रवक्ता हरिप्रसाद पन्तले बताए । ‘भाडामा लिएर, मर्मतसम्भार गरेर सञ्चालनमा आइसकेको छ,’ उनले भने, ‘नयाँ स्रेस्ता कायम गर्दै घरजग्गा खरिदबिक्री भइरहेको छ ।’

मालपोत कार्यालय र भूमिसुधार तथा मालपोत कार्यालयमा क्षति हुँदा जग्गाधनी दर्ता स्रेस्ता, रोक्का अभिलेख नष्ट भएको छ । क्षति भएका कार्यालयमा नष्ट भएका जग्गाधनी दर्ता स्रेस्ता, रोक्का अभिलेख तयार गर्न विभागले असोजमा परिपत्र नै गरेको थियो ।

पुरानै भवनमा मर्मतसम्भार गरी सञ्चालनमा आई हालसम्म ३० हजार नयाँ स्रेस्ता कायम गरिसकेको कलंकी मालपोत कार्यालयका प्रमुख मालपोत अधिकृत रवीन ढकालले बताए । ‘कुल ३ लाख स्रेस्ता जलेको थियो, त्यसमध्ये ३० हजार नयाँ स्रेस्ता कायम गरिसक्यौं,’ उनले भने । नयाँ स्रेस्ता कायम गर्न निवेदन दिएकै दिन वा भोलिपल्टसम्म तयार हुने उनको भनाइ छ ।

अत्यावश्यक भए सोही दिन पनि नयाँ स्रेस्ता कायम गरिने उनले जनाए । २०७७ यता भू–अभिलेख सूचना व्यवस्थापन प्रणाली (एलआरआईएमएस) लागू भएकाले सेवाग्राहीले नागरिकता, सक्कल पुर्जा र पालिकामा कर तिरेको कागजातसहित स्वयं उपस्थित भइसकेपछि नयाँ स्रेस्ता तयार हुँदै आएको छ । ‘२०७७ पछिको डिजिटल रेकर्ड छ, त्यसअघिको नभएकाले बायोमेट्रिक पनि गर्नुपर्छ,’ ढकालले भने, ‘काठमाडौंमा सम्पत्ति भएको तर अस्थायी रूपमा काठमाडौंबाहिर वा विदेशमा बस्नेहरू आइरहेका छन् ।’