काठमाडौँ — निजी क्षेत्रको सबैभन्दा ठूलो छाता संगठन नेपाल उद्योग वाणिज्य महासंघको साधारणसभा यही चैत २९ र ३० मा हुने भएको छ । बिहीबारको महासंघ कार्यकारिणी समितिको बैठकले चैत २९ र ३० मा केन्द्रीय महासंघको र सातवटै प्रदेशको साधारणसभा चैत २५ गतेभित्र सक्ने निर्णय गरेको हो ।

निर्वाचन आचारसंहिताका कारण स्थगित भएको केन्द्रीय महासंघ र प्रदेश महासंघको साधारणसभाको मिति तय गर्न बिहीबार कार्यकारिणी समितिको बैठक डाकिएको थियो । यसअघि २४ माघदेखि २ फागुनसम्म विभिन्न मितिमा सातवटै प्रदेश महासंघको साधारणसभा गर्ने तय भएको थियो । तर, निर्वाचन आचारसंहिताका कारण उक्त मितिमा साधारणसभा गर्न निर्वाचन आयोगबाट अनुमति नपाएपछि रोकिएको थियो । त्यही साधारणसभा यही चैत अन्तिम साता हुन लागेको हो ।