काठमाडौँ — पर्यटक उद्धारका नाममा ‘फेक रेस्क्यु’ गरी ठगी गर्ने गिरोहमा संलग्न थप दुई जना पक्राउ परेका छन् । नेपाल प्रहरीको केन्द्रीय अनुसन्धान ब्युरोले मंगलबारसम्म ९ जनालाई पक्राउ गरी अनुसन्धान भइरहेको जनाउँदै थप दुई जना पक्राउ गरेको विज्ञप्तिमा जनाएको छ । 

पछिल्लो समय पक्राउ पर्नेमा माउन्टेन हेलिकोप्टर्स प्रालिका प्रबन्ध निर्देशक राजेन्द्रबहादुर सिंह र रोयल होलिडेज एडभेन्चर एन्ड ट्राभल कम्पनी प्रालिका सञ्चालक सन्दीप तिवारी छन् । 

५६ वर्षीय सिंह वायुसेवा सञ्चालक संघ नेपालका पूर्वउपाध्यक्षसमेत हुन् । ब्युरो प्रमुख प्रहरी अतिरिक्त महानिरीक्षक मनोजकुमार केसीले पर्यटकको फर्जी उद्धार गरी ठगी गर्ने गिरोहमा पक्राउ परेका अभियुक्तले उपलब्ध गराएको अडियो प्रमाणका आधारमा सिंहलाई काठमाडौंमा पक्राउ गरिएको बताए । उनले सिंहको संलग्नता माउन्टेन एयर र वायुसेवा सञ्चालक संघकातर्फबाट पुष्टि भइनसकेको बताउँदै ‘व्यक्तिगत संलग्नता’ देखिएको अभियोगका आधारमा पक्राउ गरिएको बताए ।   

सिंह यसअघि तत्कालीन केपी शर्मा ओली सरकारद्वारा पूर्वन्यायाधीश अनिल सिन्हाको संयोजकत्वमा गठित उच्चस्तरिय नागरिक उड्डयन अध्ययन समितिमा हवाई विज्ञका रूपमा सदस्य थिए । जेन-जी आन्दोलनपछि सिन्हा मन्त्री भएपछि नेपालको समग्र हवाई क्षेत्रको सुधारसम्बन्धी अध्ययन प्रतिवेदन यिनै सिंहले प्रधानमन्त्री सुशीला कार्कीलाई बुझाएका थिए । 

पर्यटकको फर्जी उद्धारको घटना के हो ? यो घटना किन गुपचुप थियो ? पाँच प्रश्नोत्तरमा बुझ्नुहोस्

सिंह आबद्ध माउन्टेन एयरका अध्यक्ष पूर्वएआईजी विज्ञानराज शर्मा हाल गौरीबहादुर कार्कीको संयोजकत्वमा गठित जेन-जी आन्दोलनको न्यायिक जाँचबुझ आयोगका सदस्य छन् । 

०७५ जेठमा तत्कालीन पर्यटनमन्त्री रवीन्द्र अधिकारीले गठन गरेको छानबिन समितिको प्रतिवेदनले माउन्टेन हेलिकोप्टरको पनि संलग्नता देखाउँदै थप अध्ययन गर्न सुझाएको थियो । सिंहबारे केन्द्रीय अनुसन्धान ब्युरो प्रमुख केसीले, माउन्टेनका तर्फबाट नभई व्यक्तिगत संलग्नताका आधारमा पक्राउ गरेको कान्तिपुरसँगको कुरामा बुधबार बताएका छन् । 

प्रहरीका अनुसार विभिन्न ट्रेकिङ कम्पनी तथा उद्धार सेवासँग सम्बन्धित व्यक्तिहरूले मिलेमतोमा पर्यटकहरूलाई अनावश्यक रूपमा हेलिकप्टरमार्फत उद्धार गरिएको देखाई बीमा कम्पनीबाट रकम असुल्ने गरेको खुलासा भएको छ । ‘यस प्रकरणमा संलग्न थप दुई जनालाई नियन्त्रणमा लिई अनुसन्धान अगाडि बढाइएको छ,’ केन्द्रको विज्ञप्तिमा उल्लेख गरिएको छ ।  

प्रहरीका अनुसार ठगीमा संलग्न गिरोहले विदेशी पर्यटकलाई अनावश्यक रूपमा हेलिकोप्टर उद्धार गरिएको देखाई नक्कली कागजात तयार पार्ने, अस्पताल भर्ना तथा डिस्चार्ज रिपोर्ट, मेडिकल रिपोर्ट, इन्भ्वाइस र बिमा पोलिसी मिलेमतोमा बनाउने र बिमा कम्पनीबाट ठूलो रकम असुल्ने कार्य गर्दै आएका थिए । 

अनुसन्धानमा संलग्न व्यक्तिहरूले ट्रेकिङ कम्पनी, उद्धार सेवा प्रदायक तथा अन्य सम्बन्धित निकायसँग समन्वय गरी यात्रु मेनिफेस्टो, कार्गो मेनिफेस्टो (सूची) लगायतका विवरणहरू समेत फर्जी बनाएको पाइएको केन्द्रको विज्ञप्तिमा उल्लेख गरिएको छ।