आइतबार २२४ कम्पनीको सेयर मूल्य बढ्दा नेप्से ३१ अंकभन्दा बढीले उकालो लाग्यो भने कारोबार रकम अघिल्लो दिनको तुलनामा उल्लेख्य वृद्धि भएको छ।
काठमाडौँ — साताको पहिलो दिन आइतबार सेयर कारोबार मापक नेप्से परिसूचक ३१.१२ अंकले बढेको छ। अघिल्लो कारोबार दिनको तुलनामा १.१७ प्रतिशतले बढेपछि समग्र नेप्से २ हजार ६ सय ७२.५५ विन्दुमा उक्लेर बन्द भएको छ।
आइतबार कारोबारमा आएका २२४ कम्पनीको सेयर मूल्य बढ्यो, ३१ कम्पनीको मूल्य घट्यो र ५ कम्पनीको स्थिर रह्यो। यसदिन सेयर मूल्य बढ्नेभन्दा घट्ने कम्पनीको संख्या निकै कम भएकाले समग्र नेप्से दोहोरो अंकले बढेको हो।
सो दिन कुल ९५ हजार ४४५ पटकको सेयर कारोबारमा १ करोड ६६ लाख ११ हजार ४ सय ७९ कित्ता सेयर किनबेच भए। ती किनबेचमा ८ अर्ब ४० करोड २७ लाख रुपैयाँ बराबरको कारोबार भएको छ। अघिल्लो कारोबार दिनको तुलनामा कारोबार रकम बढेको हो। गत बिहीबार सेयर बजारमा ६ अर्ब २० करोड ९४ लाख रुपैयाँ बराबरको सेयर कारोबार भएको थियो।
सो दिन कारोबारमा आएका १३ उपसमूहमध्ये सबैको परिसूचक बढेपछि समग्र नेप्से ३१ अंकभन्दा बढीले उकालो लागेको हो।
