गत आर्थिक वर्षको सोही अवधिमा १ अर्ब ४ करोड रुपैयाँको ६ लाख ९९ हजार ५१० टन सिमेन्ट र क्लिंकर निर्यात भएको थियो ।
What you should know
काठमाडौँ — चालु आर्थिक वर्षको ५ महिनामा १ अर्ब १९ करोड ६४ लाख रुपैयाँको सिमेन्ट र क्लिकंर निर्यात भएको छ । भन्सार विभागका अनुसार कुल ६ लाख ६ सय ८७ टन सिमेन्ट र क्लिकंर निर्यात भएको हो ।
गत आर्थिक वर्षको सोही अवधिमा १ अर्ब ४ करोड रुपैयाँको ६ लाख ९९ हजार ५१० टन सिमेन्ट र क्लिंकर निर्यात भएको थियो । पाँच महिनामा २९ करोड ९७ लाख रुपैयाँको क्लिकंर र ८९ करोड ६६ लाख रुपैयाँको सिमेन्ट निर्यात भएको विभागले जनाएको छ ।
गत आर्थिक वर्षभर २ अर्ब ९१ करोड रुपैयाँको सिमेन्ट र क्लिकंर निर्यात भएको थियो । विभागका अनुसार २ अर्ब २१ करोड रुपैयाँको सिमेन्ट र ६९ करोड ७३ लाख रुपैयाँको क्लिंकर निर्यात भएको थियो ।
नेपालबाट सिमेन्ट र क्लिंकर भारतमा मात्रै निर्यात भइरहेको विभागको तथ्यांक छ । नेपालले यसअघि पनि ०६९/७० मा सिमेन्ट तथा क्लिंकर निर्यात गरेको थियो । तर तीन आर्थिक वर्षपछि त्यसलाई निरन्तरता दिन सकेको थिएन ।
०७०/७१ मा ५६ लाख ५९ हजार रुपैयाँ बराबरको ५ लाख ४५ हजार १ सय ५० किलो सिमेन्ट निर्यात भएको थियो । ०७१/७२ मा ६० हजार २ सय रुपैयाँ बराबरको ५ हजार ५ सय २५ किलो सिमेन्ट मात्र निर्यात भएको विभागको तथ्यांक छ ।
आर्थिक वर्ष ०७८/७९ देखि सिमेन्ट निर्यात फेरि सुरु भएको हो । आर्थिक वर्ष ०७८/७९ मा १२ लाख ९३ हजार रुपैयाँ बराबरको १५ हजार १ सय ८९ टन र ०७७/७८ मा ८३ हजार रुपैयाँ बराबरको ११ टन सिमेन्ट निर्यात भएको विभागको तथ्यांक छ । मुलुकमा ६५ सिमेन्ट उद्योग छन् ।
