काठमाडौँ — साप्ताहिक कारोबारको पहिलो दिन आइतबार सेयर कारोबार मापक नेप्से परिसूचक दोहोरो अंकले बढेको छ । अघिल्ला दुई कारोबार दिन झिनो अंकले उकालो लागेको नेप्से आइतबार ४७.५५ अंकले बढेको । गत बिहीबारको तुलनामा १.८३ प्रतिशतले बढेपछि समग्र नेप्से २ हजार ६ सय ३३.४२ विन्दुमा उक्लेको छ ।

चार कारोबार दिनपछि नेप्से फेरि २६ सय विन्दुमा उक्लिएको हो । गत आइतबार १९.९२ अंकको गिरावटपछि समग्र नेप्से २५ सय ९५ दशमलव १० विन्दुमा पुगेको थियो । 

कुल २३८ कम्पनीको सेयर मूल्य बढ्यो भने २१ कम्पनीको मूल्य घट्यो । कारोबारमा आएका १३ वटै उपसमूहहरु बढ्यो । सबैभन्दा बढी निर्जीवन बिमा, उत्पादन तथा प्रशोधन, होटल तथा पर्यटन लगायत रह्यो ।