मुख्यमन्त्रीसहितको उपस्थितिमा लुम्बिनी प्रदेशको राजधानीको मास्टर प्लानको समीक्षा कार्यक्रममा बोल्दै प्रमुख कार्यकारी अधिकृत सुशील ज्ञवालीले उत्तर–दक्षिण, पूर्व–पश्चिमका पूर्वाधार, सहर तथा नाकालाई जोडेर अघि बढ्दा राजधानीको प्रभावकारिता बढ्ने धारणा व्यक्त गरे ।
काठमाडौँ — लुम्बिनी प्रदेशको राजधानीलाई आर्थिक हिसाबले चलायमान बनाउन बुटवल–भैरहवा र नेपालगन्जसँग जोड्न आवश्यक भएको लगानी बोर्डका प्रमुख कार्यकारी अधिकृत सुशील ज्ञवालीले बताएका छन् ।
लुम्बिनीका मुख्यमन्त्रीसहितको उपस्थितिमा लुम्बिनी प्रदेशको राजधानीको मास्टर प्लानको समीक्षा कार्यक्रममा बोल्दै प्रमुख कार्यकारी अधिकृत ज्ञवालीले उत्तर–दक्षिण, पूर्व–पश्चिमका पूर्वाधार, सहर तथा नाकालाई जोडेर अघि बढ्दा राजधानीको प्रभावकारिता बढ्ने धारणा व्यक्त गरे ।
लुम्बिनी प्रदेशको राजधानीमा लगानीका लागि धेरै अवसरहरु रहेको उल्लेख गर्दै ज्ञवालीले पानी, यातायातसहित आवश्यक पूर्वाधारहरुको उपलब्धता भए निजी क्षेत्रको लगानी बढ्ने बताए ।
लुम्बिनी प्रदेशका मुख्यमन्त्री चेतनारायण आचार्यले राजधानीसँग जोडिएका सडकहरुलाई छिटोभन्दा छिटो व्यवस्थित रुपमा अघि बढाउने बताए । पर्यटकीय क्षेत्रहरुलाई पनि जोड्न पहल जारी राखेको उनको भनाइ थियो । लगानी जुटाइदिनका लागि सहयोग गर्न पनि उनले आग्रह गरे ।
कार्यक्रमका सहभागीहरुले कृषि, लगानी, राप्ति सभ्यता, स्वर्गद्वारी मन्दिर, स्वास्थ्य, शिक्षा, जनजीवन लगायतलाई पनि राजधानीसँग जोड्न आवश्यक भएको धारणा व्यक्त गरेका थिए । उनीहरुले सुझावलाई समेटर मास्टर प्लानलाई कार्यान्वयन गर्दै अघि बढ्नुपर्ने बताए ।
लुम्बिनी प्रदेशको राजधानीसम्बन्धी मास्टर प्लान तयार भइ कार्यान्वयनको प्रक्रियामा छ । कार्यक्रममा सहरी विकास मन्त्रालयका सहसचिव, लगानी बोर्डका सहसचिव, लुम्बिनी प्रदेश योजना आयोगका उपाध्यक्ष, लुम्बिनी प्रदेश पूर्वधार विकास प्राधिकरणका प्रमुख कार्यकारी अधिकृत, विज्ञ लगायतको उपस्थिति थियो ।
