सिन्धुपाल्चोक — जिल्लाको भोटेकोशी गाउँपालिका–२, कोदारीस्थित ‘इको’ पहिरो नियन्त्रणका विषयमा सहमति जुटेसँगै आठ दिनदेखि अवरुद्ध तातोपानी नाका तथा कोदारी राजमार्ग सञ्चालनमा आएको छ । 

स्थानीय र सडक डिभिजन कार्यालय चरिकोटबीच दुई महिनाभित्र पहिरो नियन्त्रणको काम सुरु गर्ने सहमतिपछि सडक अवरोध हटेको हो । सिन्धुपाल्चोकका प्रमुख जिल्ला अधिकारी बन्धुप्रसाद बाँस्तोला र सडक डिभिजन कार्यालय चरिकोटका प्रमुख नारायणदत्त भण्डारीले बिहीबार र शुक्रबार स्थानीयसँग छुट्टाछुट्टै वार्ता गरी सहमतिको बाटो खोलेका थिए । स्थानीयले इको पहिरोबाट बस्ती जोखिममा परेको भन्दै माग सम्बोधनको दबाबस्वरूप २० मंसिरदेखि सडक अवरुद्ध गरेका थिए । 

अवरुद्ध सडक खुलेपछि खासामा रोकिएका मालबाहक कन्टेनर लिपिङ हुँदै नेपाल प्रवेश गर्न थालेका छन् । भोटेकोशी–२ का वडाध्यक्ष कुमार श्रेष्ठको नेतृत्वमा भएको वार्तापछि सहमति बनेको र त्यसकै आधारमा नाका सञ्चालनमा आएको उनले बताए । '६० दिनभित्र निर्माण सुरु गर्ने सहमति भएको छ,' उनले भने ।