काठमाडौँ — वेलनेस केवल प्रवृत्ति होइन, जीवनदर्शन हो । र नेपाल यस दर्शनको प्राकृतिक जन्मभूमि हो । यही गहिरो अर्थ र सम्भावना बुझ्दै नेपालले सन् २०२५ को नोभेम्बरमा एसियन प्रोडक्टिभिटी अर्गनाइजेसनको सहकार्यमा ‘वेलनेस पर्यटन : प्याकेजिङ, मार्केटिङ, एक्रेडिटेसन तथा सर्टिफिकेसन’ विषयक पाँचदिने क्षमता अभिवृद्धि कार्यक्रम सोमबारदेखि देशभरका पर्यटन व्यवसायीबीच सुरु गरेको छ ।

नेपाल एसोसिएसन अफ टुर एन्ड ट्राभल एजेन्ट्स (नाट्टा ), नेसनल प्रोडक्टिभिटी एन्ड इकोनोमिक डेभलपमेन्ट सेन्टर र एपीओको संयुक्त आयोजनामा सुरु गरिएको यो कार्यक्रम नेपाललाई विश्वस्तरको वेलनेस गन्तव्य बनाउने ठूलो यात्राको सुरुवात मानिएको नाट्टाकी महासचिव युविका भण्डारीले बताइन् ।

नाट्टा अध्यक्ष कुमारमणि थपलियाले नेपालमा वेलनेस आयातित विषय नभई, हजारौं वर्षदेखि संस्कृति, परम्परा र दैनिकीमा मिसिएको जीवनपद्धति भएको बताए । उनका अनुसार, ध्यान र योगको मौलिक अभ्यास, आयुर्वेदिक जडीबुटी, हिमाली स्वच्छ वातावरण, धार्मिक–आध्यात्मिक चेतना र समुदायको आत्मीय आतिथ्य नेपालका प्राकृतिक शक्तिहरू हुन् । जसले दुनियाँका मानिसलाई आकर्षित गर्छन्। ती शक्तिलाई वैज्ञानिक, व्यवस्थापकीय र विश्वस्तरीय स्वरूपमा विकसित गरी प्रस्तुत गर्न सकियो भने नेपाल विश्व वेलनेस पर्यटन बजारमा मजबुत रूपमा उभिन सक्नेछ।