चितवन — चालु आर्थिक वर्षको पहिलो चौमासिकमा चितवन राष्ट्रिय निकुञ्ज घुम्ने विदेशीको संख्या केही घटेको छ । तर स्वदेशी पर्यटकको संख्या बढेका कारण प्रतिकुल अवस्थामा पनि निकुञ्ज घुम्नेको संख्यामा सुधार देखिएको छ ।

भदाै २३ र २४ काे प्रर्दशन र दसैंतिहारका बेलाको बाढीपहिरो तथा झरीमा पनि चितवन घुम्न आउनेको संख्या खासै घटेन ।  

चितवन राष्ट्रिय निकुञ्जका सूचना अधिकारी संरक्षण अधिकृत अविनाश थापाका जानकारी अनुसार साउनदेखि कात्तिकसम्म ६७ हजार ७३५ जनाले चितवन निकुञ्ज घुमेका छन् । अघिल्लो वर्ष यो अवधिमा निकुञ्ज भ्रमण गर्ने पर्यटकको संख्या ६३ हजार २८ जना थियो । तर निकुञ्ज घुम्ने पर्यटकमा गत वर्षभन्दा स्वदेशी बढेको र विदेशीको संख्या घटेको निकुञ्जको तथ्याङ्कले देखाउँछ ।

निकुञ्जको तथ्यांक अनुसार गत साउनदेखि कात्तिकसम्म २४ हजार ६९२ विदेशी, ३ हजार ३४५ सार्क देशका र ३९ हजार ६९८ नेपालीले यहाँ घुमेका छन् । गत वर्ष यो अवधिमा निकुञ्ज घुम्ने विदेशीको संख्या २९ हजार ६१ थियो । त्यसैगरी सार्क मुलुकका ५ हजार ८२१ र स्वदेशी २८ हजार १४६ ले चितवन निकुञ्ज घुमेका थिए । 

गत वर्षभन्दा यो वर्षको पहिलो चौमासिकमा ४ हजार ३६९ विदेशी र सार्क देशका २ हजार ४७६ पर्यटक कम आएका छन् । निकुञ्ज घुम्ने स्वेदशी पर्यटकको संख्या गत वर्षको साउनदेखि कात्तिकसम्म भन्दा यो पटक ११ हजार ५४९ जना बढी हुँदा कुल पर्यटकको संख्यामा सुधार देखिएको हो ।

असोज र कात्तिकमा स्वदेशी/विदेशी दुवै खालका पर्यटक धेरै आउने समय हो । तर गत वर्ष र यो वर्ष पनि असोज लागेपछि सुरु भएको बाढीपहिरोले पर्यटक प्रभावित भएका हुन् । यो वर्ष भदौ २३ र २४ मा भएको जेनजी आन्दोलन र तोडफोड, आगजनी जस्ता ध्वंसात्मक गतिविधिले पर्यटन क्षेत्र नराम्ररी प्रभावित भयो । 

चितवन निकुञ्ज घुम्न सर्वाधिक पर्यटक आउने कात्तिकमा पनि पर्यटक आवागनको संख्या राम्रो नदेखिएका कारण पर्यटन व्यवसायीहरु उत्साहित छैनन् । पर्यटकीय होटलहरुको संस्था क्षेत्रीय होटल संघ (हान) चितवन सौराहा अध्यक्ष ओम पाण्डे जेनजी आन्दोलनपछि विदेशी पर्यटकले धमाधम बुकिङ रद्द गरेको बताए । ‘बुकिङदर ७० देखि ९० प्रतिशतसम्म थियो । धेरैले रद्द गरे । त्यसैले विदेशी पर्यटकको संख्या कम देखिएको हो,’ उनले भने । 

दसैंको समयमा पनि झरी र बाढीपहिरो आएर मुख्य राजमार्ग बन्द हुँदा पर्यटन प्रभावित भयो । तिहारका दुई/तीन दिन सौराहालगायतका निकुञ्जछेउका मुख्य पर्यटकीय क्षेत्र भरिभराउ हुँदा पर्यटन व्यवसायीलाई केही राहत दिएको थियो ।