राष्ट्र बैंकले सार्वजनिक गरेको बागमती प्रदेशको आर्थिक गतिविधि अध्ययनले गत आर्थिक वर्षमा समग्र कृषि बालीमध्ये खाद्य तथा अन्य बालीको उत्पादन ६.५ प्रतिशतले घटेको देखाएको छ ।
What you should know
काठमाडौँ — आर्थिक वर्ष २०८१/८२ मा बागमती प्रदेशमा समग्र कृषि बालीको उत्पादन ०.८ प्रतिशतले बढेको सरकारी प्रतिवेदनले देखाएको छ । अघिल्लो वर्ष सो उत्पादन ०.६ प्रतिशतले बढेको थियो ।
राष्ट्र बैंकले सार्वजनिक गरेको बागमती प्रदेशको आर्थिक गतिविधि अध्ययनले गत आर्थिक वर्षमा समग्र कृषि बालीमध्ये खाद्य तथा अन्य बालीको उत्पादन ६.५ प्रतिशतले घटेको देखाएको छ । अघिल्लो वर्ष यस्तो उत्पादन ४.५ प्रतिशतले बढेको थियो ।
समीक्षा अवधिमा कोदो उत्पादन ५.२ प्रतिशतले बढेको छ । सोही अवधिमा धान उत्पादन १.१, मकै उत्पादन ५, फापर उत्पादन ५.१, गहुँ उत्पादन १८.५ र जौ उत्पादन ३२.६ प्रतिशतले घटेको देखिन्छ । अघिल्लो वर्ष गहुँ उत्पादन ०.६, धान उत्पादन ०.८, जौ उत्पादन ५.५ प्रतिशतले बढेको थियो ।
सो अवधिमा मकै उत्पादन ०.३, कोदो उत्पादन ३.१ र फापर उत्पादन ८.७ प्रतिशतले घटेको थियो । गत आर्थिक वर्ष आलु उत्पादन ८.३, भटमास उत्पादन १२.३, तेलहन बालीको उत्पादन २१.० र दलहन बालीको उत्पादन २७.२ प्रतिशतले घटेको प्रतिवेदनले देखाएको छ ।
अघिल्लो वर्ष आलु उत्पादन १३.३ र तेलहन बालीको उत्पादन २४.५ प्रतिशतले वृद्धि भएको थियो । सो अवधिमा दलहन बालीको उत्पादन ११.४ र भटमास उत्पादन १८.५ प्रतिशतले घटेको थियो ।
आर्थिक वर्ष २०८१/८२ मा यस प्रदेशमा भएको खाद्य तथा अन्य बालीको उत्पादनमा आलु उत्पादनको हिस्सा ३४.०, मकै उत्पादनको हिस्सा ३०.२ र धान उत्पादनको हिस्सा २२.९ प्रतिशत रहेको छ । समीक्षा वर्षमा यस प्रदेशको कुल कृषि उत्पादनमा खाद्य तथा अन्य बालीको हिस्सा ६१.१ प्रतिशत रहेको प्रतिवेदनले औंल्याएको छ ।
