काठमाडौँ — पछिल्ला केही दिनयता सामाजिक सञ्जालमा नयाँ प्रकारको ट्रेन्ड चलेको छ । जसमा कम्पनीहरूले गल्ती नगरेका भए पनि ‘अफिसियल अपोलोजी स्टेटमेन्ट’ सार्वजनिक गर्दै माफी मागिरहेका छन् ।

कम्पनीका लेटरहेडसहित आधिकारिक जस्तो देखिने ती वक्तव्यहरूमा गल्तीको स्वीकारोक्ति होइन, बरु आफ्नै सेवाको प्रशंसा र मार्केटिङ झल्किन्छ । यो ट्रेन्डमा 'बुद्ध एयर', 'पठाओ'जस्ता कम्पनीहरू पनि सहभागी छन् ।

गत आइतबार आफ्ना ग्राहकहरूलाई उत्कृष्ट सेवा प्रदान गरेको भन्दै बुद्ध एयरले माफीनामा सार्वजनिक गरेको हो । बुद्ध एयरले दिउँसो १२ बजेर ७ मिनेटको पोस्टमा भनेको छ, 'प्रिय यात्रु महानुभावहरू, विगत २८ वर्षदेखि हामीले बुद्ध एयरमार्फत नेपालमा हवाई यात्रा अत्यन्त सहज बनाएकोमा दोषी ठहरिएका छौँ ।'

बुद्ध एयरअघि राइडिङ सेयरिङ एप 'पठाओ'ले गत शनिबार माफीनामा सार्वजनिक गरेको थियो । लेटरहेडसहितको उक्त विज्ञप्तिमा पठाओको कामबारे तारिफ गरिएको छ । शनिबार दिउँसो ३ बजेर १६ मिनेटमा अफिसियल सामाजिक सञ्जाल अकाउन्टमा पठाओले स्टेटमेन्टको पहिलो लाइनमा नै भनेको छ, 'यहाँको सबैभन्दा राम्रो र सुरक्षित राइड सेयरिङ प्लेटफर्म भएकोमा माफी माग्न चाहन्छौँ ।'