काठमाडौँ — डेडिकेटेड र ट्रंकलाइन बक्यौता विवादमा शिवम् सिमेन्टलेले पहिलो किस्ता बुझाएको छ । नेपाल विद्युत् प्राधिकरणका अनुसार सोमबार  शिवम्‌ले पहिलो किस्ता बराबरको २ करोड ३८ लाख ८८ हजार रुपैयाँ बुझाएको हो । 

प्राधिकरणका अनुसार आइतबार हिमाल आइरन पहिलो किस्ता बराबरको २४ लाख ५० हजार  रुपैयाँ  तिरेको थियो ।प्राधिकरणले बक्यौता नबुझाएको भन्दै कात्तिक ४ र कात्तिक ७ मा २३ वटा उद्योगको बिजुली काटेको थियो । 

प्राधिकरणका अनुसार तिहारयता भलवारी स्वचालित चामल उद्योग, ⁠पञ्चकन्या स्टिल, ⁠ पञ्चकन्या प्लास्टिक,  ⁠श्याम प्लास्टिक,  ⁠सिद्धार्थ पेट प्लास्ट,  घराना फूड्स, ⁠गोयन्का फूड्स, रिलायन्स स्पिनिङ मिल्स,  त्रिवेणी सिन्थेटिकले पहिलो किस्ता तिरेपछि लाइन जोडिएको छ । उद्योगहरुले पहिलो किस्ता बुझाएसँगै विच्छेद गरिएको लाइन जोडिएको प्राधिकरणका प्रवक्ता राजन ढकालले बताए ।

यही १७ कात्तिकमा प्रधानमन्त्री सुशीला कार्की, अर्थमन्त्री रामेश्वर खनाल, ऊर्जा, जलस्रोत तथा सिँचाइमन्त्री कुलमान घिसिङ, मुख्यसचिव एकनारायण अर्याललगायत नेपाल उद्योग वाणिज्य महासंघका अध्यक्ष चन्दप्रसाद ढकालबीच डेडिकेटेड र ट्रंकलाइनको महसुल भुक्तानीलाई सरलीकरण गर्ने तथा पुनरावलोकन सुन्ने व्यवस्था मिलाउन सहमति भएको थियो । उक्त छलफलमा उद्योगीहरूले प्राधिकरणले दिएको २८ किस्तामध्ये पहिलो किस्ताबराबरको रकमलाई ‘किस्ता’ नभई ‘विवादित रकम’ मानेर धरौटीका रूपमा बुझाउने, विद्युत् लाइन तुरुन्त जडान गरिने र त्यसपछि पुनरावलोकन, पुनरावेदन तथा न्यायिक प्रक्रियाबाट अघि बढ्ने मौखिक सहमति भएको बताइएको थियो ।