काठमाडौँ — नेपाल-भारत संयुक्त प्राविधिक टोली (जेटीटी) को १७ औं बैठक सुरु भएको छ । सोमबारदेखि पोखरामा बैठक सुरू भएको ऊर्जा मन्त्रालयका सहसचिव सन्दीप देवले बताए ।

सहसचिव देवका अनुसार आगामी सन् २०२६ को मेबाट सञ्चालनमा ल्याउने भनिएको निर्माणाधीन बुटबल–गोरखपुर अन्तरदेशीय प्रसारण लाइनको हालसम्मको प्रगतिबारे छलफल गरिनेछ । उक्त प्रसारणलाइन निर्माण सम्पन्न भएपछि कसरी चार्ज गर्ने भन्ने मुख्य एजेन्डा रहेको मन्त्रालयका प्रवक्ता एवं सहसचिव देवले बताए ।

त्यस्तै  २२० केभी चमेलिया (नेपाल)–जलजिबी (भारत) प्रसारण लाइको प्रगति र कार्यान्वयनबारे छलफल हुने मन्त्रालयले जनाएको छ ।  कुल ४५ किलोमिटर यो प्रसारण लाइनमा ४४.५ किमि नेपाली भूभागमा पर्छ भने भारतमा जम्मा ५ सय मिटर मात्र छ । २०८१ मा बसेको नेपाल -भारत ऊर्जा सचिवस्तरीय बैठकले उक्त प्रसारण लाइनको अध्ययन सकाउने र सन् २०२७ भित्र निर्माण सकेर सञ्चालनमा ल्याउनेसमेत सहमति भएको थियो ।