नेपालका ३ हजारभन्दा बढी कपडा उद्योगलाई रिलायन्सले धागो उपलब्ध गराउँदै आएको छ । वार्षिक करिब १० अर्ब रुपैयाँ बराबरको धागो भारत र तेस्रो देशमा निर्यात गर्दै आएको छ । तर, उद्योग ठप्प हुँदा उत्पादन शून्य छ ।
What you should know
विराटनगर — डेडिकेटेड फिडर एवम् ट्रंकलाइन बक्यौता नतिरेको भन्दै नेपाल विद्युत् प्राधिकरणले विद्युत् लाइन काटिएपछि सुनसरीको इटहरी उपमहानगर–१२ खनारमा रहेको देशकै ठूलो रिलायन्स स्पिनिङ मिल्स एक सातायता उत्पादन ठप्प छ । प्राधिकरणले कात्तिक ४ मा उद्योगको विद्युत् लाइन काटेको हो ।
२०५१ सालमा सुरु गरिएको रिलायन्स स्पिनिङ मिल्समा झन्डै ३५ सयभन्दा बढी कामदारले रोजगारी पाएको छ । अत्याधुनिक प्लान्ट रहेको उक्त उद्योगले दैनिक एक सय टनभन्दा बढी उत्पादन गर्दै आएको छ ।
उद्योगले टर्कीदेखि जापानसम्म धागो निर्यात गरिरहेको कम्पनीले जनाएको छ । सधैं गुल्जार रहने उद्योग बिजुली काटिएपछि सुनसान छ । ‘बिजुली काटिएपछि उद्योग चलाउन सक्ने अवस्था नै छैन,’ उद्योगका प्रबन्धक महेश पोखरेलले भने, ‘बिजुली नजोडिएसम्म उद्योग चल्ने स्थिति छैन ।’
प्राधिकरणले ७५ करोड रुपैयाँ बक्यौता रहेको भन्दै विद्युत् लाइन काटेको छ । ‘हामीमाथि जबर्जस्ती ७५ करोडको बिल थोपरेको हो,’ उद्योगका प्रबन्धक पोखरेलले भने, ‘मासिक ६ करोड रुपैयाँ तिर्दै आएका थियौं तर अब अन्धकारमा बस्नुपरेको छ ।’
उद्योग ठप्प भएपछि ३५ सय कामदार ‘बिदामा’ राखिएको कम्पनीले जनाएको छ । उत्पादन नहुँदा निर्यात पनि ठप्प भएको छ । ‘मासिक ६ करोड त बिजुलीको मासिक बिल तिरिरहेका थियौं । निर्यातबापत देशमा डलर पनि भित्रिरहेकै थियो’, प्रबन्धक पोखरेलले भने, ‘बिजुली काट्दा राज्यलाई नै घाटा भएको छ ।’
नेपालका ३ हजारभन्दा बढी कपडा उद्योगलाई रिलायन्सले धागो उपलब्ध गराउँदै आएको छ । वार्षिक करिब १० अर्ब रुपैयाँ बराबरको धागो भारत र तेस्रो देशमा निर्यात गर्दै आएको छ । तर, उद्योग ठप्प हुँदा उत्पादन शून्य छ ।
