काठमाडौँ — नेप्सेको घट्ने क्रमले बुधबार पनि निरन्तरता पाएको छ । मंगलबार १९.४३ अंकले घटेर बन्द भएको नेप्से बुधबार २२.५८ अंकले घटेको हो । अघिल्लो दिनको तुलनामा ०.८९ प्रतिशतले घटेपछि समग्र नेप्से २ हजार ५ सय ५.५८ विन्दुमा ओर्लेर बन्द भएको छ । 

बुधबार कारोबारमा आएकामध्ये ४० कम्पनीको सेयर मूल्य बढ्दा २०६ कम्पनीका घटेको छ भने ५ को स्थिर रह्यो । यसरी सेयर मूल्य बढ्नेभन्दा घट्ने कम्पनी धेरै भएपछि समग्र नेप्से दोहोरो अंकले घटेको हो ।

बुधबार ३५ हजार ७ सय ५० पटकको कारोबारमा ७६ लाख ११ हजार ६ सय ६० कित्ता सेयर किनबेच भए । ती किनबेचमा ३ अर्ब १० करोड १८ लाख रुपैयाँ बराबरको सेयर कारोबार भएको छ । अघिल्लो दिनको तुलनामा कारोबार रकम घटेको हो । 

मंगलबार ३८ हजार ८ सय २७ पटकको कारोबारमा ७४ लाख ८८ हजार २ सय ७३ कित्ता सेयर किनबेच भएका थिए । ती किनबेचमा ३ अर्ब ३६ करोड ६१ लाख रुपैयाँ बराबरको सेयर कारोबार भएको थियो ।

सो दिन कारोबारमा आएका १३ उपसमूहमध्ये सामूहिक लगानी कोष उपसमूहको परिसूचक सामान्य बढ्यो । बाँकी सबै उपसमूहको परिसूचक घटेपछि समग्र नेप्सेमा दोहोरो अंकको गिरावट आएको हो । सो दिन व्यापार उपसमूहको परिसूचक सबैभन्दा बढी २.०९ प्रतिशतले घटेको छ ।

बैंकिङ उपसमूहको परिसूचक ०.५४, विकास बैंकको १.१४, फाइनान्स कम्पनीको १.१०, होटल तथा पर्यटनको १.०६, जलविद्युत्को १.१८, लगानीको ०.९८, जीवन बिमाको ०.७५, उत्पादन तथा प्रशोधनको ०.३९, लघुवित्तको ०.५६, निर्जीवन बिमाको ०.६५ र अन्यको १.२२ प्रतिशतले घटे । तर, सामूहिक लगानी कोष उपसमूहको परिसूचक भने ०.२४ प्रतिशतले सकारात्मक छ ।