काठमाडौँ — भदौ २४ को प्रर्दशनका क्रममा काठमाडौं बत्तीसपुतलीस्थित हिमालयन बैंकको शाखामा आगजनी भयो । आगजनी र लुटपाटबाट बैंकमा ठूलो क्षति पुगेको छ । सो क्रममा बैंकमा रहेको लकरमा पनि क्षति पुगेको छ ।

सो शाखामा करिब २५० वटा लकर रहेकामा सबै भरिभराउ थिए । आगलागीबाट लकर नजलेको तर सोही कोठामा आगलागी भएकाले बाहिरको तातोले लकरभित्र रहेका केही गहना पग्लिएको, आकार बिग्रेको बैंकले स्वीकारेको छ ।

करिब २५० वटा लकरमध्ये १० प्रतिशतमा मात्र क्षति पुगेको र बाँकी ९० प्रतिशत सुरक्षित रहेको हिमालयन बैंक बत्तीसपुतली शाखा प्रबन्धक तुलसी कार्कीले बताए । ‘कुल लकरमध्ये ९० प्रतिशत सुरक्षित छन्, बाँकी १० प्रतिशत लकरमा गहनाभित्र रहेको लोहा पग्लिएकाले गहनाको आकार बिग्रिएको देखिन्छ र तर सुन तथा चाँदीको परिमाणमा कमी आएको छैन,’ शाखा प्रबन्धक कार्कीले भने, ‘लकर प्रयोगकर्तामध्ये धेरै स्थानीय नै हुनुहुन्थ्यो । उहाँहरुले बैंकमा आगलागी भएको देख्नुभएको थियो । त्यति ठूलो आगलागीमा पनि बैंक लकरमा रहेको धनमाल कसरी सुरक्षित रहन सके भनेर हामीलाई धन्यवाद दिइरहनुभएको छ ।’

लकरमा रहेका सामाग्रीको बिमा नहुने र क्षतिको सम्पूर्ण जिम्मेवार ग्राहक नै हुने भएकाले क्षति पुगेका सेवाग्राहीलाई पनि बैंकले क्षतिपूर्ति दिन नसक्ने उनले प्रस्ट्याए । ‘लकरमा रहेको सामानमा क्षति पुगे त्यसको जिम्मेवारी ग्राहक नै हुनुपर्छ भनेर हामीले यो विषय लकर सुविधा लिन आउने ग्राहकलाई सुरुमै बताएका हुन्छौं,’ उनले थपे, ‘यसकारण अहिले आगलागीमा लकरमा रहेका सामग्रीमा क्षति पुगेका ग्राहकलाई पनि बैंकले केही दिन सक्दैन ।’