काठमाडौँ — पहिरोले राजमार्ग अवरुद्ध भएसँगै आकासिएको हरियो तरकारीको भाउ घट्न थालेको छ । आपूर्तिमा सहजतासँगै भाउ घट्न थालेको कालीमाटी फलफूल तथा तरकारी बजार विकास समितिले जनाएको छ ।

समितिको तथ्याङ्क अनुसार एक साताको तुलनामा अधिकांश हरियो तरकारीको होलसेल भाउ घटेको छ । टनेलको गोलभेँडा २५ प्रतिशतले घटेर ३१ रुपैयाँ, भारतीय गोलभेँडाको मूल्य २८ प्रतिशतले घटेर २२ रुपैयाँमा बिक्री भइरहेको छ ।

गोलभेँडासँगै स्थानीय काउली, सेतो मुला, बोडी, घिउ सिमी, भटमास कोसा, तिते करेला, पाकेको फर्सी, रायो साग, पालुङ्गो साग, च्याउलगायत तरकारीको मूल्य घटेको जनाएको छ । ‘दसैँको सार्वजनिक बिदा र त्यसपछि आएको वर्षाले राजमार्ग अवरुद्ध हुँदा आपूर्तिमा केही कमी भएकै थियो । जसका कारण केही वस्तुको भाउ बढेको देखियो । होलसेलमा मूल्य नबढे पनि खुद्रामा धेरै बढेको देखियो,’ समितिका सूचना अधिकारी विनय श्रेष्ठले भने, ‘राजमार्ग खुलेसँगै आपूर्तिमा सहजता आएको छ । दैनिक ६ सय टनभन्दा बढी तरकारी भित्रिन थालेको छ, जसका कारण होलसेलमा मूल्य घटेको हो ।’

समितिको विवरण अनुसार असोज १६ गते प्रतिकिलो १ सय १० रुपैयाँ पर्ने टनेल बोडीको मूल्य घटेर ८५ रुपैयाँ पुगेको छ । प्रतिकिलो ८५ रुपैयाँ पर्ने मकै बोडीको मूल्य घटेर ६५ रुपैयाँ, प्रतिकिलो १ सय १० रुपैयाँ पर्ने घिउ सिमीको मूल्य घटेर ९५ रुपैयाँमा बिक्री भएको छ ।

कालीमाटी फलफूल तथा तरकारी बजारमा भित्रिने तरकारीले उपत्यकाको करिब ७० देखि ७५ प्रतिशत माग धान्छ । बाँकी माग बल्खु, बालाजु, टुकुचा, कोटेश्वर र चाबहिललगायतका तरकारी बजारले धान्दै आएका छन् । समितिका अनुसार प्रतिकिलो ८५ रुपैयाँ पर्ने भटमास कोसाको मूल्य घटेर ७५ रुपैयाँ पुगेको छ । प्रतिकिलो ५५ रुपैयाँ पर्ने तिते करेलाको मूल्य घटेर ५० रुपैयाँमा बिक्री भइरहेको छ ।