काठमाडौँ — पहिरोले राजमार्गहरूमा अवरोध सिर्जना गरेसँगै हरियो तरकारीको मूल्य बढ्न थालेको छ । उपत्यका भित्रिने मुख्य नाका नागढुंगा–नारायणगढ सडकअन्तर्गत धादिङको जवाङखोला र चितवन तुइनखोलामा पहिरो खसेपछि उपत्यकामा पर्याप्त तरकारी नभित्रिँदा मूल्य बढेको हो ।

अहिलेको सिजनमा औसत दिनको ७ सय टनसम्म तरकारी भित्रिनुपर्ने कालीमाटी फलफूल तथा तरकारी बजार विकास समितिको भनाइ छ । तर आगमन न्यून छ । उपत्यकाको मागअनुसार भित्रिएको छैन । जसले गर्दा तरकारीको मूल्य होलसेलमै बढेको छ ।

‘पछिल्लो समय मूल्य बढ्नुको कारण आपूर्तिमा कठिनाइ नै हो । तरकारी अन्य नाकाबाट भित्रिए पनि मुख्य नाका अवरुद्ध भएको छ । सहज रूपमा तरकारी भित्रिन सकेको छैन,’ समितिका सूचना अधिकारी विनय श्रेष्ठले भने, ‘यसले मूल्य बढाउन सघाएको छ ।’ 

समितिको मूल्य विश्लेषण तथ्यांकअनुसार एक सातायता सबैभन्दा धेरै काँक्रो (हाइब्रिड) को मूल्य ७१.२० प्रतिशतले बढेको छ । असोज ४ मा प्रतिकिलो २४ रुपैयाँ (होलसेल मूल्य) मा बिक्री भएको काँक्रोको मूल्य बढेर ४३ रुपैयाँ पुगेको छ । काँक्रोसँगै गोलभेडा, आलु, सुकेको प्याज, बन्दा, काउली, बोडी, घिउसिमी, मटरकोसा, तितेकरेला, लौका, हरियो फर्सी, भिन्डीलगायत सबैजसो हरियो तरकारीको मूल्य बढेको छ ।

असोज ४ मा फर्सी हरियो (लाम्चो) को मूल्य किलोको ३५ रुपैयाँ थियो । बिहीबार (असोज ९ मा) मूल्य ५९ प्रतिशतले बढेर ५६ रुपैयाँ पुगेको छ । प्रतिकिलो ७५ रुपैयाँ रहेको भिन्डीको मूल्य बढेर ८४ रुपैयाँ, किलोको ७५ रुपैयाँ पर्ने रायो सागको मूल्य बढेर १ सय ८ रुपैयाँ, किलोको ९० रुपैयाँ पर्ने पालुंगो साग बढेर १ सय २२ रुपैयाँ पुगेको छ ।

‘बिहीबार बिहान ७ बजेसम्म हरियो तरकारी १ सय ८४ टन आयो । तरकारी, फलफूल, माछालगायत सबै गरेर ३ सय ६३ टन आयो । बुधबार पनि ताजा तरकारी २ सय २३ टन मात्रै आयो, सबै गरेर ४ सय ८९ टन मात्रै भित्रियो,’ श्रेष्ठले भने, ‘मंगलबारको आगमन हेर्दा पनि पर्याप्त छैन । तरकारी, फलफूल, माछालगायत सबै गरेर ६ सय १७ टन मात्रै आयो ।’ 

सोमबार भने तरकारी मात्रै ८ सय १० टन भित्रिएको थियो । फलफूल माछासहित ९ सय ३९ टन भित्रिएको थियो । तर शनिबार तरकारी, फलफूल माछा गरेर जम्मा ५ सय १८ टन मात्रै भित्रिएको थियो । जसले गर्दा बजार मूल्य केही बढेको श्रेष्ठको भनाइ छ । 

समितिका अनुसार कन्ये च्याउका मूल्य १० प्रतिशतले बढेर किलोको १ सय ८४ रुपैयाँ पुगेको छ । ब्रोकाउली २१ प्रतिशतले बढेर १ सय ८२ रुपैयाँ, लोकल गोलभेडा ५ प्रतिशतले बढेर किलोको ४३ रुपैयाँ र टनेल गोलभेडा ९ प्रतिशतले बढेर किलोको ५५ रुपैयाँ पुगेको छ ।

उपत्यकामा धादिङ, नुवाकोट, काभ्रे, चितवन, मकवानपुर र तराईका जिल्लाबाट तरकारी भित्रिन्छ । भारतबाट पनि तरकारी आयात हुन्छ । तराई र भारतबाट आउने मुख्य नाकामा समस्या हुँदा पर्याप्त तरकारी भित्रिन नसकेको समितिले जनाएको छ । रातो आलुको मूल्य १४ प्रतिशतले बढेर ३६ रुपैयाँ, सुकेको प्याज (भारतीय) को मूल्य १७ प्रतिशतले बढेर प्रतिकिलो ४२.२५ रुपैयाँ पुगेको छ । 

एक साताअघि किलोको ४४ रुपैयाँ रहेको बन्दाको मूल्य बढेर ४८ रुपैयाँ, तने बोडी १ सय ११ रुपैयाँबाट बढेर १ सय ३८ रुपैयाँ पुगेको छ । किलोको ९५ रुपैयाँ पर्ने घिउसिमीको मूल्य बढेर १ सय ३० रुपैयाँ, किलोको ८५ रुपैयाँ पर्ने मटरकोसाको मूल्य बढेर १ सय २ रुपैयाँ पुगेको छ ।

होलसेलमै मूल्य बढ्दा खुद्रा मूल्य पनि अचाक्ली चुलिएको हो । खुद्रामा पसलैपिच्छे मूल्य फरक पाइन्छ । जानकारका अनुसार तरकारी एकथरी बिचौलियाले किसानबाट संकलन गर्ने, अर्कोले थोक बजारसम्म ल्याइदिने र खुद्रा पसलले पनि होलसेल नगई गाडीमार्फत आफैं ल्याउने प्रचलन छ । यसरी विभिन्न तह हुँदा मूल्य आफूखुसी निर्धारण हुने गरेको हो ।