अर्थमन्त्री खनालले एमसीसीका परियोजनाहरूको सफल कार्यान्वयनका लागि सरकारबाट गर्नुपर्ने कार्यहरूमा ढिलाइ नहुने बताए
काठमाडौँ — अर्थमन्त्री रामेश्वरप्रसाद खनाल र नेपालका लागि संयुक्त राज्य अमेरिकाका राजदूत डिन आर थम्पसनबीच आज भेटघाट भएको छ । अर्थमन्त्री खनाल र अमेरिकी राजदूतबीच नेपालको हालको परिवर्तित अवस्था र अमेरिकाले यस परिस्थितिमा नेपाललाई गर्न सक्ने सहयोगका विषयमा छलफल भएको थियो ।
उक्त छलफलमा अर्थमन्त्री खनालले विशिष्ट परिस्थतिमा गठन भएको वर्तमान सरकारको मुख्य कार्य तोकिएको समयमा निर्वाचन सम्पन्न गर्ने, पुनर्निर्माण योजना र सहुलियत प्याकेजको माध्यमबाट निजी क्षेत्रको मनोबल माथि उठाउनु रहेको बताएका थिए ।
अमेरिकी राजदूत थम्प्सनले हालैको घटनामा ज्यान गुमाउने परिवारप्रति समवेदना तथा सहानुभूति व्यक्त गर्दै यस परिस्थितिमा अमेरिकी सरकार नेपालको साथमा रहेको बताए । उनले एमसीसीको सहयोगमा सञ्चालित एमसीए नेपालबाट कार्यान्वयन भइरहेका परियोजनाहरू समयमै सम्पन्न गर्ने कार्यमा सरकारको थप प्रतिबद्धता आवश्यक रहेको बताए ।
अर्थमन्त्री खनालले उक्त परियोजनाहरूको सफल कार्यान्वयनका लागि सरकारबाट गर्नुपर्ने कार्यहरूमा ढिलाइ नहुने विश्वास दिलाएका थिए । सो अवसरमा अर्थमन्त्री खनालले नेपालको सामाजिक आर्थिक विकासमा अमेरिकी सरकारबाट हुँदै आइरहेको निरन्तर सहयोगको उच्च सराहना गरे ।
