कोरला नाका तिब्बतको ढोङ्वासेन हुँदै सिगात्सेबाट आएको ‘चाइना नेसनल हाइवे २१९’ सँग जोडिएको छ । रसुवागढी स्थित तातोपानी नाकामा केही समय अघि आएको बाढी पहिरोले भन्सार कार्यालयसमेत पूर्वाधारहरूमा क्षति पुर्‍याएपछि वैकल्पिक बाटोको रूपमा कोरला नाका प्रयोगमा ल्याइएको हो ।

चीनबाट आएका ईभी गाडीहरू कोरलास्थित सुख्खा र खुल्ला बन्दरगाहमा राखिएका छन् । नेपाल–चीनबीच ०७५ सालमा हस्ताक्षर भएको पारवहन तथा यातायात सम्झौताको प्रोक्टोकल अनुसार कोरला नाका सुख्खा बन्दरगाह सञ्चालनमा आएको हो । 

चिनियाँ अध्यागमन कार्यालयको आमने–सामने निर्मित प्रिफ्याब प्रविधिको १० कोठे अध्यागमन तथा सुरक्षा पोस्ट स्थापना गरी अटोमेटिक सिस्टम अफ कस्टम डाटा (आयुडा) प्रणाली जडानगरी कोरला नाकाबाट व्यावसायिक कारोबार सुरु भएको हो । सीमापार चीनले भने सूचाना प्रविधि जडित भन्सार कार्यालयका अतिरिक्त क्वारेनटाइन, आवास, प्रयोगशाला, गोदाम घर, ट्रक तथा कन्टेनर पार्किङ  र सुरक्षा पूर्वाधार खडा गरी सकेको छ । 

‘कोरला भन्सारबाट छुटेका पहिलो लटका २१ वटा कन्टेनेरहरु मुस्ताङबाट तल झरेका छन् । थप आज भन्सार जाँचपास क्रममा छन् । अब कालीगण्डकी कोरिडोर अन्तर्गतको पोखरा–बेनी–जोमसोम–कोरला सडकमा व्यावसायिक रौनक थपिने छ’ मुस्ताङका प्रमुख जिल्ला अधिकारी विष्णुप्रसाद भुसालले भने, ‘मनसुन सिजनमा म्याग्दी र मुस्ताङको सीमावर्ती क्षेत्रमा पहिरोले ढुवानीमा केही असहज भएपनि पूरै अवरुद्ध भने भएको छैन । कोरलामा चिसो बढेकोले गाडी स्टार्टमा पनि केही समस्या देखिएको छ ।’