काठमाडौं — यही भदौ २३ र २४ मा भएको प्रदर्शनमा भौतिक संरचनामा भएको क्षतिको बिमा दाबी आउन थालेको छ । शुक्रबारसम्म करिब १५ अर्ब रुपैयाा बराबरको दाबी भुक्तानी आइसकेको नेपाल बिमक संघका महासचिव अशोक खड्काले बताए ।

मंगलबार र बुधबारदेखि नै दाबी आउन थालेको र शुक्रबारसम्म सबै निर्जीवन बिमा कम्पनीमा मात्र १५ अर्ब रुपैयाा बराबरको दाबी परिसकेको उनको भनाइ छ । 

‘सुरुको दाबीमा धेरै रकम आएको हुन्छ । यसकारण परेकोमध्ये करिब ९ अर्बको वास्तविक भुक्तानी हुन आउला,’ उनले भने, ‘दाबी आउने क्रम भर्खर सुरु भएकाले यो संख्या धेरै बढ्ने अनुमान छ ।’सेवाग्राहीलाई प्रदर्शनकारीले गरेको क्षतिको बिमा दाबी कम्पनीमा गर्न र कम्पनीले पनि छिटो भुक्तानी दिन बिमक संघले बिमा कम्पनीहरूलाई आग्रह गरेको छ । 

‘असहज परिस्थितिका कारण सिर्जित क्षतिको जानकारी गर्न सम्पूर्ण बिमित तथा ग्राहकलाई आआफ्नो सम्बन्धित बिमा कम्पनीमा सम्पर्क गरी सहयोग गर्नुहुन अनुरोध छ,’ संघले जारी गरेको विज्ञप्तिमा भनिएको छ । आगजनी तथा तोडफोडले धेरै कार्यालय पूर्ण रुपमा क्षतिग्रस्त बनेका छन् । केहीमा आंशिक क्षति पुगेको छ । 

एकै पटक धेरै क्षति भएकाले बिमा कम्पनीले सबै दाबी भुक्तानी गर्न सक्छन् सक्दैनन भन्ने चासो सबैतिर छ । यही चासोलाई ध्यानमा राखेर हालसम्म परेको बिमा दाबी, भुक्तानी,र्फ्छ्योटलगायत प्रक्रिया छिटो र सहज तरिकाले टुंग्याउन बिमक संघले आग्रह गरेको हो । 

क्षतिको अवस्था हेर्दा बिमा दाबी धेरै आउने देखिन्छ । तर धेरै सरकारी संरचनाको बिमा भएको छैन । निजीलगायत अन्य क्षेत्रको बिमा भएकाले धेरै दाबी आउन सक्ने अनुमान छ । सवारी साधनको हकमा तेस्रो पक्ष बिमा गरिएको रहेछ भने उसले भुक्तानी पाउँदैन । अहिले बिमा पाउन सवारी साधनको पूर्ण बिमा गरिएको हुनुपर्छ ।