धरान उपमहानगरपालिकाको वडा २० मा निर्मित माया धराने बेसारको माग यूके, हङकङ, जापान, अमेरिका, पोल्यान्ड, कोरिया लगायतका देशहरूमा बढेको छ।
What you should know
धरान — ‘माया धराने’ बेसारको चर्चा केवल धरानमा मात्र सीमित छैन, समुन्द्रपारिका देशहरूमा पनि यसको चर्चा चुलिएको छ । गत असार २७ गते उद्घाटन गरिएको माया धराने बेसारले अहिले बजार पिटिरहेको छ ।
धरान उपमहानगरपालिका वडा २० मा बेसार उद्योग सञ्चालनमा आएपछि धरान बाहिरका विभिन्न जिल्लाहरूमा मात्र नभई समुन्द्रपारिका देशहरू यूके, हङकङ, जापान, अमेरिका, पोल्यान्ड, कोरियालगायतमा पनि माया धराने बेसारको लोकप्रियता र उपभोक्ताहरूको माग आउन थालेको छ ।
स्थानीय किसानले उत्पादन गरेको बेसारलाई स्थानीय स्तरमै प्रशोधन गरेर प्याकेजिङ गरेर बजारमा ल्याइएको बेसार ‘माया धराने’ ब्रान्डमा लोकप्रिय बन्दै गएको छ । माया धराने बेसारलाई धेरैले रुचाएका मात्र छैनन्, सामाजिक सञ्जालमा बेसारको प्याकेटको फोटो राखेर पोस्ट गर्नुका साथै साथ–समर्थन पनि गरिरहेका छन् । अहिले धरान घुम्न आएकाहरू प्रायःले कोसेलीको रूपमा माया धराने बेसार लाने गरेका छन् ।
धरानको कोसेलीका रूपमा ब्रान्डिङ गरेर घुम्न आउने पाहुना, पर्यटकले किनेर लैजाने वातावरणसमेत तयारी भएको माया धराने बेसार सञ्चालक समितिका सदस्य समिर तामाङले बताए । उनका अनुसार १ महिनाको अन्तरालमा ३८ लाख रुपैयाँबराबरको माया धराने बेसार बिक्री भइसकेको उनले बताए । एक किलो बेसारको बजार मूल्य ८ सय रुपैयाँ छ । माया धराने बेसार उद्योगबाट दिनमा ३ सय केजी बेसार उत्पादन हुने गरेको तामाङले बताए । उनले भने, 'दिनमा ३ सय केजी बेसार उत्पादन हुने गरेको छ, यतिले पनि उपभोक्ताको माग धान्न धौ–धौ परेको छ ।'
माया धराने बेसार अहिले धरानका विभिन्न किराना पसलहरूबाट पनि किन्न सकिने उनले बताए । तामाङले भने, ‘नेपालका विभिन्न ठाउँहरूबाट अर्डर आइरहेको छ, त्यससँगै अहिले भने विदेशबाट बढी अर्डर आउन थालेको छ ।’
तामाङका अनुसार कृषकबाट हलेदो क्वालिटी हेरेर प्रतिकिलो ३ सय रुपैयाँसम्म दिने गरिएको छ । अहिलेसम्म धरान उपमहानगरपालिकाका कृषकहरूकै बेसार उठाइरहेको उनले बताए । फ्याक्ट्रीमा बेसार धुने, सुकाउनेदेखि लिएर प्याकेजिङ गर्नेसम्म ९ जना कर्मचारी कार्यरत रहेको उनले जानकारी दिए ।
धराने कृषक समाज, उपभोक्ता सञ्चालक समितिले धरान उपमहानगरपालिकासँग सहकार्य गरेको छ । उपमहानगरपालिकाले भवन निर्माण गर्नेदेखि फ्याक्ट्रीमा प्रशोधनका लागि आवश्यक मेसिन पनि किनेको तामाङले बताए ।
स्थानीय उत्पादनलाई ब्रान्डिङ गरेर विदेशी स्तरसम्म पुर्याउनु विकासको एक खुड्किलो भएको समाजसेवी लिला भुजेल बताउँछिन् । 'माया धराने बेसारले जति चर्चा र माया पाएको छ, यो माया धरानेलाई मात्र नभई नेपाली उत्पादनलाई माया गरेको हो,' उनी भन्छिन् । स्थानीय उत्पादनलाई यसरी नै महत्त्व दिएर उद्योगहरू सञ्चालन गर्न सके, आत्मनिर्भर बनाउन सके धरानको मात्र नभई समग्र नेपालको विकास हुने उनको धारणा छ ।
‘माया धराने’ बेसार उद्योग मेयर हर्क साम्पाङको परिकल्पना हो । उनले वडा नम्बर २० मा बेसार उद्योग खोल्ने एजेन्डा ल्याएपछि कार्यपालिका बैठकले अनुमोदन गरेको थियो । यो वडा बेसार पकेट क्षेत्र पनि मानिन्छ । बेसार उद्योगको भवन निर्माण गर्न उपमहानगरपालिकाबाट १६ लाख ५० हजार र उपभोक्ताबाट २ लाख ८ हजार ६ सय ११ रुपैयाँ लगानी भएको निर्माण समितिले जानकारी दिएको छ ।
