सिन्धुपाल्चोक — कोदारी राजमार्गको क‍ोदारी खण्ड (इको) मा सोमबारको पहिरोले अवरुद्ध तातोपानी नाका अझै सञ्चालनमा आउन सकेको छैन । बिहीबार फेरि पहिरो खस्न थालेपछि सडक खोल्ने काम तत्काल रोकिएको सिन्धुपाल्चोक उद्योग वाणिज्य संघका अध्यक्ष बुद्धराज बस्नेतले बताए ।

'वर्षा रोकिएन, जबर्जस्ती सडक बनाउन खोज्दा अर्को जोखिम हुन सक्छ,' उनले भने, 'नाका अझै बन्द छ । करोडौं मूल्यका सामग्री बोकेका कन्टेनर चीन र पहिरो पारिपट्टि अलपत्र छन्, यत्तिकै भइरहने हो भने समयमा व्यापारीले सामान पुर्‍याउन सक्दैनन् । आजबाट उनीहरु बाध्य भएर फेरि भरिया प्रयोग गर्ने अवस्थामा पुगेका छन् ।'

बिहीबार पनि नाका नखुलेपछि फलफूल कुहिने डरले भरियालाई बोकाउन थालिएको बस्नेतले जनाए । सीमा क्षेत्रमा सामान अलपत्र परेपछि प्रतिकन्टेनर ५० हजारसम्म थप खर्च गरेर भरियामार्फत तातोपानी ल्याउन थालेका छन् ।

चरिकोट सडक डिभिजन कार्यालयका सूचना अधिकारी सुरज महर्जनका अनुसार वर्षाका सडक मर्मतसम्भार र पुनर्निर्माणमा कठिनाइ भएको हो ।

नेपाल हिमालय सीमापार वाणिज्य संघका उपाध्यक्ष सुजित बस्नेतले वर्षा नरोकिँदा सडक पुनर्निर्माण गर्ने काम अघि बढ्न नसक्दा नाका खुल्न नसकेको बताए । 'झन्डै तीन सातापछि बल्ल खुलेको उत्तरी तातोपानी नाका चार दिन चल्यो, त्यतिखेर ५०/६० कन्टेनर फलफूल, चाडपर्व लक्षित सामग्री नेपाल भित्रिएको थियो,' उनले भने, '३०/३५ खाली कन्टेनर यताबाट चीन प्रवेश गरेका थिए, फेरि बन्द भएको नाका नखुल्दा व्यवसायी आजित छन् ।'