काठमाडौँ — निजी क्षेत्रको लगानीमा सिन्धुपाल्चोकको भोटेकोशी गाउँपालिकामा निर्माणाधीन ४४ मेगावाट क्षमताको भोटेकोशी–१ जलविद्युत् आयोजनाको सुरुङ सोमबार ब्रेकथ्रु गरिएको छ ।

इलेक्ट्रो पावर कम्पनीको लगानीमा उक्त आयोजना निर्माण भइरहेको छ । आयोजनाले सुरुङ निर्माण २०८० फागुनमा सुरु गरेको थियो । २ किमि ६ सय ३८ मिटर लम्बाइको सुरुङको चौडाइ ५.२ र उचाइ ५.२ मिटरको रहेको छ । सुरुङ निर्माणमा संलग्न भूगोल इन्फास्ट्रक्चर कम्पनीले उक्त सुरुङको फिनिसिङ पूरा गर्न ६ देखि ८ महिना लाग्ने अनुमान गरेको छ । 

भोटेकोशी गाउँपालिका–३ र ४ मा बाँध तथा सोही पालिकाको वडा नम्बर ५ चाकुमा विद्युत् गृहको निर्माण भइरहेको छ । मुख्य लगानीकर्ता इलेक्ट्रो पावरका अध्यक्ष मोहनविक्रम कार्कीले आगामी फागुनसम्म उत्पादन सुरु गर्ने योजनासहित अन्य काम भइरहेको जानकारी दिए । उनका अनुसार करिब ९ अर्ब ५६ करोड लागत अनुमान गरिएको उक्त आयोजनाको लागनीकर्ता सबै नेपाली रहेका छन् ।